आगामी पतधोरणात व्याजदरात घट शक्य

नवी दिल्लीः मान्सूनच्या चांगल्या पावसामुळे डाळींच्या किमती नियंत्रणात आल्यास ९ ऑगस्टला रिझर्व्ह बँकेतर्फे जाहीर करण्यात येणाऱ्या द्वैमासिक पतधोरण आढाव्यात व्याजदरात पाव टक्का घट करण्याची शक्यता बँक ऑफ अमेरिका ​मेरिल लिंचने वर्तवली आहे.

दुष्काळी परिस्थितीमुळे रब्बीचा हंगाम वाया गेल्यामुळे डाळींच्या भावात २७ टक्क्यांनी वाढ झाली आहे. ‘आगामी महिनाभरात मान्सून चांगला बरसल्यास खरीप हंगामातील पिकांच्या उत्पादनात गेल्या वर्षीच्या तुलनेत ३९ टक्के वाढ होण्याची शक्यता आहे. तसे झाल्यास डाळींच्या भावात २० टक्क्यांची घट होण्याची शक्यता आहे,’ असे मेरिल लिंचच्या अहवालात नमूद करण्यात आले आहे. चांगला मान्सून, नियंत्रणात आलेली महागाई, ग्राहक किंमत निर्देशांकात झालेली घट या निकषांच्या आधारे रिझर्व्ह बँक व्याजदर घटवून सामान्यांना दिलासा ​देऊ शकते, असेही या अहवालात स्पष्ट करण्यात आले आहे.

‘चांगल्या मान्सूनचा परिणाम डाळींच्या किमती नियंत्रणात येण्यास होईल, असा विश्वास वाटतो. त्यामुळे ग्राहक किंमत निर्देशांकही मर्यादेत राहील,’ असेही या अहवालात म्हटले आहे.