नमो अॅपच्या माध्यमातून पाच कोटींची विक्री

नवी दिल्ली:

'नरेंद्र मोदी ब्रँड' च्या पाच कोटी रुपयांच्या वस्तुंची गेल्या तीन महिन्यांत नमो अॅपच्या माध्यमातून विक्री झाली आहे. 'नमो अगेन' म्हणजेच 'पुन्हा एकदा नमो' हे घोषवाक्य लिहिलेल्या या वस्तूंमध्ये टीशर्ट्स, टोप्या, कीचेन्स, मग आदींचा समावेश आहे.

नमो अॅपद्वारे विकल्या गेलेल्या या वस्तूंची आकडेवारी भाजपचा उत्साह वाढवणारी आहे. गेल्या तीन महिन्यात १५ लाख ७५ हजार वस्तू विकल्या गेल्या आहेत. लोकसभा निवडणुकीआधी या वस्तूंच्या विक्रीत आणखी जोमाने वाढ होईल, असा भाजपचा कयास आहे.

भाजपची प्रादेशिक कार्यालये तसेच देशभरातील भाजप कार्यकर्त्यांनी या वस्तू मोठ्या प्रमाणावर खरेदी केल्या आहेत. गेल्या महिन्यात या वस्तू पेटीएम आणि अॅमेझॉनच्या प्लॅटफॉर्मवरदेखील उपलब्ध होत्या. नमो ब्रँडअंतर्गत सर्वाधिक विक्री टी-शर्ट्सची झाली आहे. एकूण विक्रीत टी-शर्ट्चा वाटा ५० टक्के आहे.

भाजप खासदारांनी केलेलं आवाहन तसेच उत्तर प्रदेशचे मुख्यमंत्री योगी आदित्यनाथ आणि विजय रुपानी यांनी केलेलं आवाहन यामुळे देखील विक्रीत वाढ झाली. हिमाचल प्रदेशचे भाजपचे खासदार अनुराग ठाकूर यांनी 'नमो अगेन' लिहिलेलं टीशर्ट घालून आपला फोटो ट्विट केला होता. हे टी-शर्ट नमो अॅपवर ४९९ रुपयांना उपलब्ध आहे.

पंतप्रधान मोदींच्या ६८ व्या वाढदिवशी १७ सप्टेंबरला नमो अॅपवर सेलदेखील होता. या सेलमध्ये टी-शर्टची २.६४ कोटी रुपयांची, टोप्यांची ५६ लाख रुपयांची, कीचेन्सची ४३ लाख रुपयांची, कॉफी मगची ३७ लाख रुपयांची तर नोटबुकची ३२ लाख रुपयांची विक्री झाली. गेल्या तीन महिन्यात ३८ लाख रुपयांचे 'नमो पेन्स'ही विकले गेले आहेत.

नमो अॅपवर कुठल्या वस्तूंची किती विक्री झाली पाहा -

एकूण विक्री - ५ कोटी २० लाख रुपये

एकूण वस्तू - १५ लाख ७५ हजार

वस्तूनिहाय विक्री (रुपयांमध्ये)

टीशर्ट - २,६४,७३,३२१
कॅप - ५६,०२,८६५
कीचेन - ४३,०६,७३७
मग - ३६,३८,८१८
नोटबुक - ३२,२०,५८३
पेन - ३७,७३,८४३