बीएसएनएल – एमटीएनएल एकत्र होणार

नवी दिल्लीः भारत संचार निगम लिमिटेड (बीएसएनएल) व महानगर टेलिफोन निगम लिमिटेड (एमटीएनएल) या दोन्ही सरकारी दूरसंचार कंपन्यांचे विलिनीकरण होऊ घातले आहे. हे विलिनीकरण झाल्यास ते दोन्ही कंपन्यांसाठी पोषक असेल, असा विश्वास बीएसएनएलचे मुख्य व्यवस्थापकीय संचालक अनुपम श्रीवास्तव यांनी सांगितले आहे. या विलिनीकरणाच्या वेळी दोन्ही कंपन्यांची कर्जे व वेतनाची रचना प्रथम लक्षात घ्यावी लागेल, याकडेही त्यांनी लक्ष वेधले आहे.

जून महिन्यात दूरसंचार विभाग या दोन्ही कंपन्यांच्या विलिनीकरणाचा प्रस्ताव कॅबिनेटपुढे मांडणार आहे. गेल्या महिन्यात याविषयी दूरसंचार विभागाचया झालेल्या बैठकीत विचार करण्यात आला होता. सध्या दोन्ही कंपन्या आर्थिक तणावाखाली असून विलिनीकरणामुळे या स्थितीत फरक पडेल, असेही मत यावेळी मांडले गेले. एमटीएनएलची मोबाइल सेवा दिल्ली व मुंबई या शहरांत सुरू आहे. बीएसएनएलची मोबाइल सेवा उर्वरित देशात दिली जात आहे. त्यामुळे दोन्ही कंपन्यांच्या एकत्रिकरणातून उदयाला येणारी कंपनी देशभर मोबाइल सेवा देणारी सर्वात मोठी सरकारी कंपनी ठरणार आहे.