इंटरनेट टेलिफोनीचे चार हजार ग्राहक

वृत्तसंस्था, नवी दिल्ली

भारत संचार निगम लिमिटेड अर्थात बीएसएनएलतर्फे नव्याने सुरू करण्यात येणाऱ्या इंटरनेट टेलिफोनीला मध्यम स्वरूपाचा प्रतिसाद मिळाला आहे. चालू आठवड्यात सुरू होणाऱ्या या सेवेसाठी चार हजार जणांनी नोंदणी केली आहे, अशी माहिती बीएसएनएलचे अध्यक्ष अनुपम श्रीवास्तव यांनी दिली. या सुविधेला प्रामुख्याने तरुणांचा अधिक प्रतिसाद मिळेल, असा विश्वास त्यांनी व्यक्त केला.

इंटरनेट टेलिफोनी सुरू करणारी बीएसएनएल ही पहिली मोबाइलसेवा पुरवठादार कंपनी ठरली आहे. बीएसएनएलच्या विंग्ज या अॅपच्या साह्याने देशात कुठूनही कुठेही अमर्यादित कॉलिंग करता येणार आहे. २५ जुलैपासून सुरू होत असलेल्या या सेवेसाठी वार्षिक १,०९९ रुपये शुल्क भरावे लागणार आहे. केंद्रीय दूरसंचार मंत्री मनोज सिन्हा यांनी ११ जुलैला या सुविधेची घोषणा केली होती.