अर्थसंकल्प निर्मितीत महिलांचे मोठे योगदान

मटा ऑनलाइन वृत्त। नवी दिल्ली

लोकसभेत सादर होत असलेला या वर्षीचा केंद्रीय अर्थसंकल्प तयार करण्याची प्रक्रिया वैशिष्ठ्यपूर्ण म्हणावी लागेल. याचे कारण यंदाचा अर्थसंकल्प साकारण्यात महिला अधिकाऱ्यांचे मोठे योगदान हे आहे. अर्थसंकल्प तयार करण्याच्या प्रक्रियेत सहभागी झालेल्या वरिष्ठ स्तरावरी अधिकाऱ्यांमध्ये ४१ टक्के महिला होत्या. विशेष म्हणजे अर्थसंकल्पाशी संबंधीत एकूण कामकाजाच्या ५२ टक्के भागाची जबाबदारी या महिला अधिकाऱ्यांच्या शिरावर होती.

याबाबत सूत्रांनी दिलेल्या माहितीनुसार, विविध केंद्रीय मंत्रालये आणि विभागांमधील अतिरिक्त सचिव आणि संयुक्त सचिवस्तरावरील ३४ वित्तीय सल्लागारांमध्ये १४ महिला अधिकारी आहेत. अर्थसंकल्पाशी संबंधीत ५२ टक्के कामकाज या महिला अधिकाऱ्यांनीच पाहिले.

अर्थ, आरोग्य आणि कुटुंबकल्याण, मनुष्यबळ विकास, युवक, कौशल्य विकास आणि खेळ अशा महत्त्वाच्या मंत्रालयाच्या वित्तीय सल्लागारांनी अर्थसंकल्पपूर्व प्रक्रियेत मोठे योगदान दिले आहे. या व्यतिरिक्त, नागरी विमान उड्डयन, नगर विकास, रसायन आणि खते, कोळसा आणि खाणकाम, पोस्ट, सामाजिक न्याय, विज्ञान आणि औद्योगिक संशोधन मंत्रालयाचे अधिकारी देखील अर्थसंकल्प कामकाज प्रक्रियेत सहभागी झाले.

विविध मंत्रालयाच्या या सल्लागारांची मुख्य जबाबदारी अर्थसंकल्पपूर्व प्रक्रियेबाबत आहे. अर्थमंत्री अरुण जेटली २०१७ चा अर्थसंकल्प लोकसभेत सादर करत आहेत. अर्थसंकल्प तयार करण्याची प्रक्रिया नोव्हेंबर महिन्यातच सुरू झाली होती.