म. टा. वृत्तसेवा, नाशिकरोड
नवनवीन तंत्रज्ञानाचा अवलंब करून ग्राहकांना विश्वासार्ह सेवा देणारी बँक अशी ओळख असलेल्या बिझनेस बँकेने गेल्या आर्थिक वर्षात सव्वा तीन कोटींचा ढोबळ तर १ कोटी ३ लाख रुपयांचा निव्वळ नफा कमावल्याची माहिती बँकेचे अध्यक्ष विजय चोरडिया यांनी दिली.
बिझनेस बँकेचे नुकतेच बावीसाव्या वर्षात पदार्पण झाले आहे. त्या पार्श्वभूमीवर आणि आर्थिक वर्ष पूर्ण झाल्याच्या निमित्त बँकेत आयोजित करण्यात आलेल्या पत्रकार परिषदेत ते बोलत होते. यावेळी विजय चोरडिया यांनी बिझनेस बँकेच्या आर्थिक प्रगतीबाबत सांगितले की, बँकेने गेल्या आर्थिक वर्षात २२३.६६ कोटी रुपयांचा व्यवसाय केला असून, त्यातून बँकेला १ कोटी ३ लाख रुपये इतका निव्वळ नफा झाला आहे. बँकेच्या सीडी रेशोचे प्रमाणही ४४ टक्क्यांवरून ५४ टक्क्यांवर गेले आहे. गेल्या आर्थिक वर्षात बँकेच्या ठेवी १५४ कोटी ११ लाख रुपये इतक्या झाल्या असून, बँकेने ७८ कोटी ५६ लाख रुपयांचे कर्जही वितरीत केले आहे. गत आर्थिक वर्षापेक्षा कर्जवाटपात १५ कोटी रुपयांची वाढ झाल्याचे त्यांनी यावेळी सांगितले. बँकेचा ग्रॉस एनपीए ४.६० टक्के इतका असून, निव्वळ एनपीए शून्य आहे. सरकारी रोख्यांच्या विक्रीतूनही बँक तब्बल ९५ लाखांचा नफा मिळविण्यात यशस्वी झाली आहे. या नफ्याचा समावेश निव्वळ नफ्यात करण्यात आलेला नाही. याप्रसंगी बँकेचे संचालक वसंत नगरकर, अशोक तापडिया, श्रीनिवास लोया, वसंत गुरनानी, डॉ. पूनमचंद ठोळे, पुरुषोत्तम फुलसुंदर, मोहन लाहोटी, सुरेश टर्ले, नेमिचंद कोचर, सचिन घोडके, ॲड. गोरखनाथ बलकवडे, डॉ. उमेश नगरकर, गोपी आलठक्कर, आशुतोष राठोड, दयानंद सदाफुले, राजश्री कपोते, मुख्य कार्यकारी अधिकारी अशोक भाबड आदी उपस्थित होते.