सरकारी बँकांची वसुली
३६ हजार कोटींची
नवी दिल्ली : चालू आर्थिक वर्षाच्या पहिल्या तिमाहीमध्ये सरकारी बँकांनी ३६,५५१ कोटी रुपयांची कर्जवसुली केली आहे, अशी माहिती केंद्रीय अर्थमंत्री अरुण जेटली यांनी सोमवारी दिली. गेल्या आर्थिक वर्षात बँकांनी एकूण ७४,५६२ कोटी रुपयांची वसुली केली होती. त्या तुलनेत या पहिल्या तिमाहीतील वसुलीचा आकडा लक्षणीय आहे. या वसुलीमुळे बँकांच्या थकीत कर्जाचा आकडा २१ हजार कोटी रुपयांनी कमी झाला आहे, असे ते म्हणाले. चालू आर्थिक वर्षामध्ये सरकारी बँकांनी एकूण १,८१,०३४ कोटी रुपयांच्या वसुलीचे लक्ष्य आखले आहे, असेही त्यांनी सांगितले. एका फेसबुक पोस्टमधून त्यांनी ही माहिती दिली.
अॅक्सिसचा नवा फंड
मुंबई : अॅक्सिस म्युच्युअल फंडने अॅक्सिस ग्रोथ ऑपोर्च्युनिटिज या नव्या फंडाची घोषणा केली आहे. हा फंड ओपन एण्डेड असून यातील रक्कम लार्ज व मिड कॅपमध्ये गुंतविण्यात येणार आहे. या एनएफओमध्ये १५ ऑक्टोबरपर्यंत गुंतवणूक करता येईल. या फंडात किमान पाच हजार रुपये गुंतवणे आवश्यक असून वाटप झाल्यापासून १२ महिन्यांपूर्वी रीडीम वा स्विच आऊट केलेल्या फंडांवर एक टक्का एग्झिट लोड आकारला जाईल.