सेवाक्षेत्राच्या कामगिरीत सुधारणा
नवी दिल्ली : सेवाक्षेत्राच्या कामगिरीत डिसेंबरमध्ये सुधारणा झाल्याचे दिसून आले. डिसेंबरमध्ये सेवाक्षेत्राचा निर्देशांक ५३.३ नोंदवण्यात आला. नोव्हेंबरमध्ये तो ५२.७ होता. या निर्देशांकाची गेल्या पाच महिन्यांतील ही सर्वोत्तम कामगिरी आहे. रोजगारवाढ, उत्पादनास वाढती मागणी आणि व्यापार-उद्योगांत परतलेली उमेद यामुळे हा निर्देशांक वधारला, असे विश्लेषकांनी म्हटले आहे. हा निर्देशांक पन्नासच्या वर असणे हे वाढीचे आणि पन्नासपेक्षा कमी असणे अर्थव्यवस्थेच्या घसरणीचे निदर्शक आहे.
अॅमेझॉन-फ्युचर एकत्र
नवी दिल्ली : अॅमेझॉन इंडिया व फ्युचर समूहाने सोमवारी दीर्घकालीन व्यावसायिक भागीदारीची घोषणा केली. फ्युचर समूहाचा एक भाग असणाऱ्या बिगबाजारच्या माध्यमातून गृहोपयोगी वस्तूंपासून अनेक प्रकारची उत्पादने विकली जातात. या भागीदारीमुळे बिगबाजारमध्ये उपलब्ध असणाऱ्या वस्तू अॅमेझॉनवर ऑनलाइन खरेदी करता येतील.