केंद्राचा 'धन'वर्षाव; 'डीए'त २ टक्के वाढ

मटा ऑनलाइन वृत्त । नवी दिल्ली

केंद्रीय कर्मचाऱ्यांची यंदाची दिवाळी दणक्यात साजरी होणार आहे. केंद्रीय मंत्रिमंडळानं आज, धनत्रयोदशीच्या एक दिवस आधी, महागाई भत्ता दोन टक्क्यांनी वाढवण्याचा निर्णय घेऊन आपले लाखो अधिकारी-कर्मचारी आणि निवृत्तीवेतनधारकांना दिवाळीची भेटच दिली आहे.

१ जुलै २०१६ पासून हा वाढीव महागाई भत्ता लागू होणार आहे. त्यामुळे लक्ष्मीपूजनाआधीच ५० लाख कर्मचारी आणि ५८ लाख निवृत्तीवेतनधारकांवर लक्ष्मी प्रसन्न झाली आहे.

याआधी याच वर्षी केंद्र सरकारनं महागाई भत्त्यात सहा टक्क्यांची घसघशीत वाढ केली होती. त्यामुळे डीए मूळ वेतनाच्या १२५ टक्क्यांपर्यंत पोहोचला होता. त्यानंतर सातव्या वेतन आयोगाच्या शिफारशी लागू झाल्या, तेव्हा डीए आणि तेव्हाचं मूळ वेतन लक्षात घेऊन नवं मूळ वेतन निश्चित करण्यात आलं होतं. या वाढीनंतर डीएमध्ये तीन टक्के वाढ करण्याची मागणी कर्मचारी संघटनांनी केली होती. परंतु, केंद्रीय मंत्रिमंडळानं आज दोन टक्के डीए वाढीवर शिक्कामोर्तब केलं.