स्वस्त विमान प्रवासाची संधी; राकेश झुनझुनवाला यांची कंपनी 'या' मार्गावर उड्डाणे सुरू करणार

नवी दिल्ली : बिग बुल म्हणून प्रसिद्ध असलेले अनुभवी गुंतवणूकदार राकेश झुनझुनवाला यांची एअरलाइन, अकासा एअर, १५ सप्टेंबरपासून चेन्नई-मुंबई मार्गावर उड्डाणे चालवणार आहे. कंपनीने मंगळवारी सांगितले की ती ७ ऑगस्ट रोजी मुंबई-अहमदाबाद मार्गावर आपली पहिली व्यावसायिक सेवा चालवेल. कंपनी बेंगळुरू-कोची आणि बेंगळुरू-मुंबई मार्गावर अनुक्रमे १३ ऑगस्ट आणि १९ ऑगस्टपासून सेवा सुरू करेल. कंपनीने सांगितले की ती दर महिन्याला दोन अतिरिक्त विमाने जोडेल आणि २०२३ च्या अखेरीस त्यांच्या ताफ्यात १८ विमाने असतील. कंपनीला बोईंगकडून पहिले विमान मिळाले असून कंपनीचा एअरलाइन कोड QP असेल.

चेन्नई आणि मुंबई दरम्यान नवीन दैनंदिन उड्डाणे 15 सप्टेंबर 2022 पासून सुरू होतील, असे एअरलाइनच्या निवेदनात म्हटले आहे. कंपनीने सांगितले की दर १२ महिन्यांनी १२ ते १४ विमाने आपल्या ताफ्यात समाविष्ट करण्याची त्यांची योजना आहे. येत्या पाच वर्षांत बोईंगकडून ७२ विमाने मिळणार आहेत. आकासा एअरला डीजीसीएकडून ७ जुलै रोजी एअर ऑपरेटरचे प्रमाणपत्र मिळाले.

वाचा -

दरम्यान, अकासा एअरने त्यांच्या व्यावसायिक उड्डाणांसाठी तिकीटांची विक्री सुरू केली आहे. कंपनीचे पहिले उड्डाण ७ ऑगस्टपासून मुंबई ते अहमदाबाद दरम्यान सुरू होणार आहे. या दोन शहरांदरम्यान विमान कंपनी आठवड्यातून २८ उड्डाणे चालवेल. यानंतर, कंपनी १३ ऑगस्टपासून बेंगळुरू आणि कोची दरम्यान दर आठवड्याला २८ उड्डाणे चालवेल. कंपनीने सुरुवातीच्या टप्प्यात अहमदाबाद, बंगळुरू, मुंबई आणि कोची नेटवर्कसाठी तिकीटांची विक्री सुरू केली आहे. मुंबई-अहमदाबाद मार्गावरील किमान एकतर्फी भाडे ३,९४८ रुपये असेल, असे एअरलाइनचे म्हणणे आहे. या मार्गावरील इतर विमान कंपन्यांचे भाडे ४,२६२ रुपये आहे.

वाचा -

कंपनीची खासियत काय?
अकासा एअरलाईनने एकूण ७२ विमानांची ऑर्डर दिली आहे, त्यापैकी १८ विमाने त्यांना मार्च २०२३ पर्यंत मिळणार आहेत. त्यानंतर उर्वरित ५४ विमानांचा पुरवठा पुढील चार वर्षात केला जाईल. अकासा एअर SNV Aviation Pvt. Ltd. या ब्रँड नावाने भारतीय विमान वाहतूक क्षेत्रात प्रवेश करत आहे. सुरुवातीच्या टप्प्यात अकासा एअरची उड्डाणे मेट्रो शहरांमधून टियर-२ आणि टियर-३ शहरांसाठी असतील.

ही एक बजेट एअरलाइन आहे. अकासा एअर फ्लाइटमध्ये गरम अन्नासाठी ओव्हन नसतील. प्रवाशांनी पॅक केलेला उपमा/नूडल्स/पोहे/बिर्याणी खाण्यापूर्वी काही मिनिटे गरम पाण्यात ठेवावी लागेल. आकासा एअरच्या विमानांमध्ये एकाच वर्गाच्या जागा असतील. यामध्ये कोणताही बिझनेस वर्ग असणार नाही.