चीन स्पर्धक नव्हे, प्रेरणास्थान!: राजन

मटा ऑनलाइन वृत्त । बेंगळुरू

भारत सरकार व भारतीयांकडून कायम 'स्पर्धक' वा 'शत्रू' म्हणून पाहिल्या जाणाऱ्या चीनबद्दल रिझर्व्ह बँकेचे गव्हर्नर रघुराम राजन यांनी काहीसं वेगळं मत मांडलं आहे. 'भारतानं चीनकडं स्पर्धक म्हणून पाहण्याऐवजी 'प्रेरणास्थान' म्हणून पाहायला हवं,' असं राजन यांनी म्हटलं आहे.

बेंगळुरू येथे 'असोचेम'तर्फे आयोजित एका कार्यक्रमात बोलताना राजन यांनी हे मत मांडलं. 'लक्ष्य निश्चित असेल आणि जे करायचं आहे त्यावर पक्का विश्वास असेल तर एखादा देश काय करू शकतो हे चीननं गेल्या तीन दशकांत दाखवून दिलं आहे. त्यामुळं चीनकडून भारतानं प्रेरणा घेतली पाहिजे. याउलट, आपण चीनला सतत कमी लेखण्याचा प्रयत्न करतो. चीनच्या स्वत:च्या काही अडचणी आहेत, हे खरं आहे. मात्र, गेल्या ३० वर्षांत या देशानं दरडोई उत्पन्नात मोठी मजल मारली आहे. चीनमधील दरडोई उत्पन्न सध्या ७.५ हजार डॉलरवर पोहोचलं आहे. त्यामुळं त्यांच्याबद्दल नकारात्मक भाव ठेवण्यापेक्षा त्यांनी जे केलं त्याचं अनुकरण करायला हवं,' असं राजन म्हणाले. मात्र, 'आता भारताला त्या मार्गावर जाता येणार नाही. 'कारण, चीन आधीच तिथं पोहोचला आहे. ती जागा आता व्यापली गेली आहे,' असंही राजन म्हणाले.

'भारत चीनकडून नक्कीच प्रेरणा घेऊ शकतो. नव्वदच्या दशकाच्या अखेरीस चीन जिथं होता, तिथं आज आपण आहोत. आणखी १० ते १५ वर्षांनंतर आपण आजच्या चीनची बरोबरी करू शकतो. याबद्दल निश्चित भविष्यवाणी करता येणार नाही, पण तशी आशा नक्कीच ठेवता येईल,' असं राजन यांनी सांगितलं.