प्रत्यक्ष करातून १० लाख कोटी जमा

ईटी वृत्त, नवी दिल्ली

देशभरातून गेल्या आर्थिक वर्षात संकलित झालेल्या प्रत्यक्ष कराने (डायरेक्ट टॅक्स) १० लाख कोटी रुपयांचा टप्पा पार केला आहे. त्यापूर्वीच्या आर्थिक वर्षाच्या तुलनेत या करसंकलनात १८ टक्क्यांची घसघशीत वाढ झाली आहे. केंद्रीय अर्थ मंत्रालयाने एका ट्विटद्वारे ही माहिती दिली.

२०१७-१८ या आर्थिक वर्षात देशभरातून १०.०३ लाख कोटी रुपये प्रत्यक्ष कर जमा झाला. ही वाढ १८ टक्के असून गेल्या सात आर्थिक वर्षांतील ती सर्वाधिक वाढ ठरली आहे, असे या ट्विटमध्ये म्हटले आहे. गेल्या आर्थिक वर्षात प्रत्यक्ष करापोटी ९.९५ लाख कोटी रुपये वसूल झाले, अशी माहिती केंद्रीय अर्थसचिव हसमुख अढिया यांनी गेल्या महिन्यात दिली होती. मात्र हा आकडा ढोबळ असल्याचे त्यांनी म्हटले होते.