वृत्तसंस्था, नवी दिल्ली
गेले वर्षभर आर्थिक मंदीचा तडाखा सोसणाऱ्या वाहन उद्योगक्षेत्राची कामगिरी दोन महिन्यांपासून सुधारताना दिसत आहे. या क्षेत्राने डिसेंबरमध्ये संमिश्र कामगिरीची नोंद केली. मारुती सुझुकी या आघाडीच्या कंपनीने तसेच, महिंद्रा अँड महिंद्राने विक्रीवाढ साधली. तर, ह्युंदाई व टोयोटा कारच्या विक्रीला फटका बसला.
मारुती सुझुकीने डिसेंबरमध्ये २.४ टक्क्यांची किंचित वृद्धी नोंदवली आहे. या कंपनीने डिसेंबरमध्ये १,२४,३७५ कारची विक्री केली. गेल्या वर्षी याच महिन्यात या कंपनीने १,२१,४७९ कार विकल्या होत्या. वॅगनआर, स्विफ्ट, सेलेरिओ, इग्निस, बलेनो, डिझायर या कारना सर्वाधिक ग्राहकपसंती होती, असे या कंपनीतर्फे सांगण्यात आले. महिंद्रा अँड महिंद्राने डिसेंबरमध्ये एक टक्का वृद्धी साधत ३७,८०१ कारची विक्री केली.
टोयोटाला फटका
टोयोटा कारच्या विक्रीत तब्बल ४५ टक्क्यांची घसरण झाली. डिसेंबरमध्ये केवळ ६,५४४ टोयोटा कार विकल्या गेल्या. मारुती सुझुकीची प्रमुख प्रतिस्पर्धी कंपनी असणाऱ्या ह्युंदाई मोटरच्या विक्रीत मात्र डिसेंबरमध्ये ९.८ टक्क्यांनी घट झाली. या कंपनीने डिसेंबरमध्ये ३७,९५३ कारची विक्री केली. डिसेंबर २०१८मध्ये हा आकडा ४२,०९३ होता.