कम्प्युटरच्या मागणीत २० टक्क्यांची वाढ

जुलै ते सप्टेंबरदरम्यान २७ लाख उपकरणांची विक्री; 'आयडीसी'चे निरीक्षण

वृत्तसंस्था, नवी दिल्ली

देशातील स्मार्टफोनच्या मागणीत वाढ होत असली तरी, कम्प्युटरच्या मागणीतही मोठ्या प्रमाणावर वाढ होत असल्याचे दिसून आले आहे. जुलै ते सप्टेंबर २०१८ या कालावधीत कम्प्युटरच्या आयातीत गेल्या वर्षीच्या तुलनेत २०.२ टक्क्यांची वाढ होऊन ती संख्या २७.१० लाखांवर पोहोचली आहे. व्यावसायिक आणि वैयक्तिक वापरासाठी कम्प्युटरची मागणी वाढल्याचे निरीक्षण 'इंटरनॅशनल डेटा कॉर्पोरेशन' (आयडीसी) या रिसर्च फर्मने नोंदवले आहे.

'आयडीसी'च्या एका अहवालानुसार गेल्या तिमाहीच्या तुलनेत जुलै ते सप्टेंबर २०१८ या तिमाहीत कम्प्युटरच्या आयातीतही मोठ्या प्रमाणावर वाढ नोंदविण्यात आली आहे. गेल्या वर्षी याच तिमाहीत वस्तू आणि सेवा कराची अंमलबजावणी करण्यात आल्याने कम्प्युटरच्या विक्रीत १०.६ टक्के घसरण नोंदविण्यात आली होती. 'आयडीसी इंडिया'चे सहायक संचालक (ग्राहक विभाग) नवकेंदर सिंह यांनी दिलेल्या माहितीनुसार देशातील कम्प्युटर बाजारपेठेत मोठ्या प्रमाणात घसरण होण्याचे प्रमुख कारण म्हणजे इंटेलच्या चिपची भासणारी कमतरता आणि दिवाळीनंतर मोठ्या प्रमाणात घसरलेली विक्री होय. यंदा बाजारपेठेत सर्वाधिक कम्प्युटरची विक्री करण्यात हेवलेट पेकार्डला (एचपी) यश आले. त्यामुळे बाजारातील एचपीचा हिस्सा वाढून ३०.७ टक्क्यांवर गेला. त्या पाठोपाठ डेल (२२.० टक्के), लेनोवो (२१.३ टक्के) आणि एसर (१२.१ टक्के) यांचा कम्प्युटर विक्रीत क्रमांक लागतो.

तीन महिन्यांत १४.५ लाख विक्री

देशांतर्गत बाजारपेठेत गेल्या तिमाहीच्या तुलनेत ३३.९ टक्के वाढीने यंदाच्या तिमाहीत १४.५ लाख कम्प्युटरची विक्री करण्यात आली आहे. 'आयडीसी इंडिया'चे 'आयपीडीएस अँड पीसी'चे संचालक निशांत बन्सल यांनी दिलेल्या माहितीनुसार गेमिंग नोटबुकसारख्या उपकरणांची विक्री मोठ्या प्रमाणावर वाढता आहे. त्यातच सणासुदीच्या काळात ऑफलाइनबरोबरच ऑनलाइन माध्यमातूनही ग्राहकांनी मोठ्या प्रमाणावर खरेदीवर भर दिला. संपूर्ण बाजारात साडेसात टक्क्यांच्या वाढीने एकूण १२.५० लाख कम्प्युटरची विक्री झाली.

लघु उद्योगांमध्ये वाढणार मागणी

बन्सल यांच्या मते ओडिशा, राजस्थान आणि आसाम या राज्यांमध्ये मोठ्या प्रमाणात शैक्षणिक योजना आखण्यात येत आहेत. त्यामुळे लघु आणि मध्यम उद्योगांकडून मोठ्या प्रमाणावर कम्प्युटरच्या मागणीत वाढ नोंदविण्यात येण्याची शक्यता आहे, असेही निरीक्षण 'आयडीसी'ने नोंदवले आहे. या शिवाय चालू आर्थिक वर्षाच्या शेवटच्या तिमाहीत मोठ्या प्रमाणावर कम्प्युटरची विक्री वाढेल, असाही अंदाज संस्थेतर्फे वर्तविण्यात आला आहे.

विक्रत्यांकडून अथवा कंपन्यांकडून ग्राहकांना सुलभ हप्त्यांवर कम्प्युटर उपलब्ध करून देण्यात येत असल्याने अन्य इलेक्ट्रॉनिक वस्तूंबरोबरच कम्प्युटरच्याही मागणीत वाढ नोंदवली जात आहे.

- निशांत बन्सल, संचालक, 'आयडीसी इंडिया'