उपनगरीय पुनर्विकास परिषद पार्ल्यात

मुंबई ः उपनगरवासियांच्या घरासंदर्भातील विविध प्रश्नांवर चर्चा करण्यासाठी तसेच इमारत पुनर्विकासाच्या प्रश्नांची उकल शोधण्यासाठी पुनर्विकास परिषद विलेपार्ले येथे होणार आहे. यंदा या परिषदेचे तिसरे वर्ष आहे. महाराष्ट्र टाइम्स यासाठी मिडिया पार्टनर आहे. या परिषदेचे आयोजन 'आम्ही पार्लेकर' या विलेपार्ले येथील उपनगरीय नियतकालिकातर्फे करण्यात आले आहे.

गेल्या काही वर्षांपासून मुंबईतील उपनगरांचे रूप पालटत आहे. बहुतांश ठिकाणी इमारतींच्या पुनर्विकासाची कामे सुरू आहेत. काही ठिकाणी इमारती उभ्या राहात आहेत, तर काही ठिकाणी बांधकामे रखडल्याचेही दिसत आहेत. अनेक सोसायट्यांमधून विकासकाबरोबर बोलणी झाल्यानंतरही काही कारणांनी प्रकल्प सुरू होत नसल्याचे दिसत आहे. त्याचप्रमाणे महापालिकेचा सुधारित विकास आराखडा व विकास नियंत्रण नियम, २०३४मध्ये बदल सुचवण्यासाठी नागरिकांना जुलैअखेरची मुदत देण्यात आली आहे. या पार्श्वभूमीवर ही पुनर्विकास परिषद रविवारी, १७ जुलै रोजी सकाळी ९.३० ते सायंकाळी ५.३० या वेळात पु. ल. देशपांडे सभागृह, टिळक मंदिर, विलेपार्ले पूर्व येथे होणार आहे.

परिषदेत पुनर्विकासासंबंधी कायदे व तरतुदी, पुनर्विकासाची आर्थिक व कायदेशीर बाजू, यशस्वी पुनर्विकासासाठी काय कराल? तसेच नव्या इमारतीतील सोयीसुविधा या विषयांवर चर्चासत्रे आयोजित करण्यात आली आहेत. परिषदेत सहभागी व्हायचे असेल तर 'आम्ही पार्लेकर', १ अल्फा, महात्मा गांधी मार्ग, विलेपार्ले पूर्व, मुंबई ४०००५७ या पत्त्यावर किंवा ०२२ - २६१७१५७५, २६१९२३७६ तसेच २६१२२४७५ या दूरध्वनि क्रमांकांवर संपर्क साधावा. इच्छुक editorial@parlekar.com या ईमेलवरही संपर्क करू शकतात. अधिक माहितीसाठी www.parlekar.com या संकेतस्थळाला भेट द्यावी, असे आवाहन 'आम्ही पार्लेकर'तर्फे करण्यात आले आहे.