दक्षता एजन्सी घेणार काळ्या पैशाचा तपशील

नवी दिल्ली ः आंतरराष्ट्रीय स्तरावर होणारे सौदे व बँकिंग व्यवहार यांची माहिती काळ्या पैशाच्या संदर्भात आर्थिक दक्षता एजन्सीकडून घेण्याचे अधिकार संरक्षण दक्षता एजन्सीला (डीआयए) मिळाले आहेत. यामुळे टेरर फंडिंग व हवाला व्यवहार यांचा माग काढणे डीआयएला शक्य होणार आहे.

जम्मू व काश्मीर तसेच ईशान्येकडील राज्यांतून मोठ्या प्रमाणावर दहशतवाद पसरला असून या कारवायांसाठी आंतरराष्ट्रीय स्तरावर पैसा पुरवला जात असल्याचे स्पष्ट झाले आहे. याच भागात हवाला रॅकेटही कार्यरत असल्याचे उघड झाले आहे. अशा प्रकारच्या सर्वच आर्थिक गुन्ह्यांवर लक्ष ठेवण्यासाठी आर्थिक दक्षता एजन्सीकडून मिळालेल्या माहितीचा डीआयएला उपयोग होणार असल्याचे या एजन्सीतील वरिष्ठ अधिकाऱ्यांचे म्हणणे आहे.

अवैध व्यवहार तसेच काळ्या पैशाच्या संदर्भातील सर्व प्राथमिक माहितीचे संकलन आर्थिक दक्षता एजन्सी (एफआययू) करत आहे. त्यानंतर या माहितीचे वर्गीकरण आर्थिक गुन्हे किंवा काळा पैसा यामध्ये केले जात आहे. अन्य एजन्सींना गरज भासेल तशी ही माहिती पुरवण्यात येणार आहे. रोखीच्या व्यवहारांचे अहवाल, परदेशांतील व्यवहार, अचल मालमत्तेची खरेदी व विक्री तसेच संशयास्पद व्यवहारांचे अहवाल यांची कसून तपासणी एफआययू करत आहे.

या संस्था ठेवताहेत लक्ष

काळ्या पैशाच्या निर्मितीवर व वहनावर एकूण २० प्रकारच्या संस्था, एजन्सी लक्ष ठेवत आहेत. यामध्ये सर्वोच्च न्यायालयाने गठित केलेले विशेष तपास पथक, रिसर्च अँड अॅनॅलिसिस विंग (रॉ) व इंटेलिजन्स ब्युरो (आयबी) यांसारख्या संस्थांचा समावेश आहे. याशिवाय सक्तवसुली संचालनालय, सीबीआय, आरबीआय, सेबी, केंद्रीय दक्षता आयोग (सीव्हीसी), नॅशनल इंटेलिजन्स ग्रीड व केंद्रीय आर्थिक दक्षता ब्युरो या संस्थाही काळ्या पैशावर लक्ष ठेवून आहेत. या सर्व संस्थांना आर्थिक दक्षता एजन्सीकडून माहिती घेण्याचे अधिकार देण्यात आले आहेत.