बँका करताहेत मुदत ठेवीदरांत कपात

ठेवीदारांना फटका

वृत्तसंस्था, नवी दिल्ली

चलनबदलामुळे देशातील सर्वच बँकांतून ‘न भूतो न भविष्यति’ अशी रोकड जमा होत आहे. रोकडटंचाई अशा प्रकारे दूर झाल्यामुळे बँकांना कर्जासाठी असलेला आधारदर कमी करणेही शक्य झाले आहे. मात्र त्याचबरोबर ठेवीदरांतही बँका कपात करत असल्यामुळे सर्वसामान्य चिंतेत पडला आहे. भारतीय स्टेट बँकेच्या ०.१५ टक्के ठेवीदर कपातीपाठोपाठ आता एचडीएफसी बँक, आयसीआयसीआय बँक या बँकांनी ठेवीदरांत पाव टक्का कपात केली आहे.

मुदत ठेवींवरील व्याजदर घटवल्यामुळे येत्या काही दिवसांत कर्जांवरील व्याजदरही कमी होण्याची शक्यता आहे. आयसीआयसीआय बँकेच्या वेबसाइटवर नमूद केल्यानुसार ३९० दिवस ते दोन वर्ष इतक्या कालावधीच्या मुदत ठेवींवरील दर ०.१५ टक्क्यांनी कमी करण्यात आले असून, ते बुधवारपासून लागू करण्यात आले आहेत. आधी हे दर ७.२५ टक्के इतके होते, ते आता ७.१० टक्क्यांवर आले आहेत.
एचडीएफसी बँकेनेही एक ते पाच कोटींपर्यंतच्या व सर्व कालावधींच्या ठेवींवरील व्याजदर ०.२५ टक्क्यांनी घटवले आहेत. बँकेच्या वेबसाइटवर नमूद केल्यानुसार सुधारीत दर गुरुवारपासून लागू झाले आहेत. सुधारीत दरांनुसार एका वर्षाच्या मुदतठेवीसाठी आता ६.७५ टक्के इतका व्याजदर आकारला जाणार आहे, जो यापूर्वी ७ टक्के होता. तीन वर्ष एक दिवस ते पाच वर्ष कालावधीच्या मुदत ठेवीसाठी यापूर्वी ६.७५ टक्के इतका व्याजदर होता, जो आता साडेसहा टक्के झाला आहे.

याआधी, देशातील सर्वात मोठी बँक असलेल्या भारतीय स्टेट बँकेने निवडक मुदतपूर्तीच्या ठेवींवरील व्याजदरांत ०.१५ टक्के इतकी कपात केली आहे. अॅक्सिस बँकेनेही फंड आधारित कर्जांवरील दरात ०.१५ ते ०.२० टक्के कपात केली आहे.