एकत्रीकरणामुळे बँकांची सक्षमता वाढेल

नवी दिल्ली : एकत्रीकरणामुळे या बँकांची सक्षमता वाढेल. तसेच, त्यांच्या कर्ज देण्याच्या क्षमतेमध्येही वाढ होईल, असा विश्वास केंद्रीय अर्थमंत्री अरुण जेटली यांनी व्यक्त केला. या बँकांची स्थिती काहीशी खालावलेली होती. त्यामुळे उद्योगजगताकडून केल्या जाणाऱ्या गुंतवणुकीवर विपरित परिणाम होत होता. मात्र या एकत्रीकरणानंतर हे चित्र बदलेल, असा विश्वास त्यांनी व्यक्त केला.

या बँकांची संचालक मंडळे या एकत्रीकरणाची प्रक्रिया पूर्ण करतील, अशी माहिती आर्थिक सेवा विभागाचे सचिव राजीव कुमार यांनी दिली. या निर्णयामुळे या बँकांच्या दैनंदिन कामकाजात प्रचंड सुधारणा होईल. ग्राहकसेवेतही सकारात्मक परिणाम दिसून येतील, असे ते म्हणाले. सरकारी बँकांची आर्थिक स्थिती सुधारत असून शेवटच्या तिमाहीमध्ये एकूण २१ हजार कोटी रुपयांच्या थकीत कर्जाची वसुली झाली आहे. चालू आर्थिक वर्षाच्या पहिल्या तिमाहीमध्येही बँकांनी ३६,५५१ कोटी रुपयांची वसुली केली आहे. केंद्र सरकारने नव्याने अंमलात आणलेल्या दिवाळखोरीविरोधी कायद्याचा या वसुलीसाठी प्रभावी उपयोग होत आहे, याकडे त्यांनी लक्ष वेधले.