म. टा. खास प्रतिनिधी, मुंबई
दुबईस्थित अल अदील ट्रेडिंग कंपनीचे अध्यक्ष व व्यवस्थापकीय संचालक, मसालाकिंग डॉ. धनंजय दातार यांनी आखाती प्रदेशातील अब्जाधीश भारतीयांच्या यादीत आठव्या क्रमांकावर झेप घेतली आहे. 'अरेबियन बिझनेस' या नियतकालिकाने यावर्षासाठी 'दि इंडियन बिलीयनर्स क्लब' या शीर्षकाखाली प्रसिद्ध केलेल्या यादीत दातारांचा आठवा क्रमांक लागला आहे. गेल्यावर्षी या यादीत डॉ. दातार सोळाव्या क्रमांकावर होते. केवळ वर्षभरात त्यांनी आखाती प्रदेशातील (जीसीसी रीजन) आघाडीच्या दहा अब्जाधीश भारतीयांमध्ये स्थान मिळवले आहे.
डॉ. दातार यांनी गेल्या ३६ वर्षांत आपल्या व्यवसायाचा आखाती देशांत जम बसवला. त्यांची 'अल अदिल ट्रेडिंग' कंपनी आखाती देशांतील स्थानिक व भारतीयांच्या घराघरांत पोहोचली आहे. दुबई प्रशासनाने डॉ. दातार यांना 'मसालाकिंग' हे नाव दिले आहे. 'फोर्ब्स मिडल ईस्ट'तर्फे गेली अनेक वर्षे 'टॉप इंडियन लीडर्स इन द अरब वर्ल्ड' यादीत मानांकन देऊन त्यांचा गौरव होत आहे. 'फोर्ब्स मिडल ईस्ट'च्या मानांकन यादीत आखातातील आघाडीच्या १०० भारतीयांमध्ये सातत्याने झळकणारे ते बहुधा एकमेव महाराष्ट्रीय आहेत.
भारतीय संस्कृतीचे आखाती देशांमध्ये संवर्धन करण्यास तसेच दुबईमध्ये मराठी उपक्रम राबवण्यास ते सातत्याने मदत करतात. सध्या कोविड १९ विषाणूच्या जागतिक साथीचा फटका आखाती देशांतील स्थलांतरित भारतीय कामगारांनाही बसला आहे. अनेकांजवळचे पैसे संपल्याने त्यांची स्थिती दयनीय आहे. अशा गरजू भारतीयांनाही डॉ. दातार यांनी आतापर्यंत तीन हजारांहून अधिक निर्धन भारतीयांना परतीच्या प्रवासाचे विमान तिकीट मोफत काढून दिले असून प्रवासासाठी अनिवार्य वैद्यकीय चाचणीचा खर्चही उचलला आहे. हे काम पुढील काही महिने सुरूच राहील. महाराष्ट्रातून गेलेले सुमारे ६० हजार भारतीय अद्यापही दुबईत अडकून पडले आहेत. त्यांना लवकरात लवकर व सुखरुप घरी परतता यावे यासाठी डॉ. दातार यांनी महाराष्ट्राचे मुख्यमंत्री उद्धव ठाकरे यांच्याशी नुकताच संपर्क साधला आहे. माननीय ठाकरे यांनीही त्वरित प्रतिसाद देऊन केंद्र सरकारकडे पाठपुरावा केला आहे. परिणामी दुबई ते मुंबई दरम्यान विमान वाहतूक लवकरच पुन्हा सुरू होणार आहे.