मुंबई :
नॅशनल हौसिंग बँकेकडे (एनएचबी) नोंदणीकृत असलेल्या दिवाण हौसिंग फायनान्स कॉर्पोरेशन लिमिटेड या खासगी हौसिंग फायनान्स कंपनीने प्रत्येकी एक हजार रुपये दर्शनी मूल्य असलेल्या तीन हजार कोटी रुपयांच्या व नऊ हजार कोटी रुपयांपर्यंत ओव्हरसबस्क्राइब करण्याचा पर्याय असलेल्या १२ कोटी सिक्युअर्ड रीडीमेबल नॉन-कन्व्हर्टिबल डिबेंचर्सची (ऋणपत्रे) खुली विक्री सुरू केली आहे.
या डिबेंचर्समध्ये तीन, पाच, सात व १० वर्षे कालावधीच्या गुंतवणुकीचे पर्याय असून कंपनीने ९.१० टक्क्यांचा वार्षिक परतावा देऊ केला आहे. या योजनेची मुदत चार जूनपर्यंत आहे. यात प्रथम अर्ज करणाऱ्या गुंतवणूकदारास प्राधान्य दिले जाणार असून किमान दहा हजार रुपये गुंतवणूक करावी लागेल. या डिबेंचर्सची नोंदणी मुंबई तसेच राष्ट्रीय शेअर बाजारात करणे प्रस्तावित असून डिमॅटच्या माध्यमातून ही गुंतवणूक केल्यास टीडीएस (उगम कर) आकारला जाणार नाही.