कर्जबाजारी शेतकऱ्यांना मोफत बियाणे

इंडियन मर्चंट्स चेंबर व राज्य सरकार यांच्यात सामंजस्य करार

म. टा. खास प्रतिनिधी, मुंबई

राज्यातील कर्जबाजारी शेतकऱ्यांनी आत्महत्या न करता पुन्हा शेती करावी आणि सुस्थितीत यावे यासाठी त्यांना मोफत बियाणे पुरवले जाणार आहे. त्यासाठी इंडियन मर्चंट्स चेंबर व राज्य सरकार यांच्या सामंजस्य करार झाला आहे. २०१२-१३ व २०१३-१४ या काळात कृषीकर्ज घेऊन त्याची पतरफेड न केल्यामुळे कर्जबुडवे झालेल्या अशा कर्जबाजारी शेतकऱ्यांना याचा लाभ मिळणार आहे.

या योजनेनुसार चालू वर्षाच्या खरीप हंगामात सरकारकडून कोणतीही मदत न मिळालेल्या, कृषीविमा कंपन्यांकडून पिक विम्यातून नुकसानभरपाई न मिळू शकलेल्या, खरीपासाठी कृषी कर्ज न मिळालेल्या किंवा राष्ट्री अन्न सुरक्षा मोहीम, राष्ट्रीय कृषी विकास योजना आणि राष्ट्रीय तेलबिया मोहीम या अंतर्गत मदत न मिळालेल्या शेतकऱ्यांना मोफत बियाणे पुरवले जाणार आहे. यामध्ये कापूस व सोयाबिन यांचे प्रमाणित गुणवत्तेचे बियाणे बियाणे उत्पादक कंपन्यांकडून प्रत्येक जिल्ह्यातील तालुका कृषी अधिकाऱ्यांना थेट दिले जाणार आहे. त्यानंतर या बियाणांचे वितरण गरजू शेतकऱ्याला करण्यात येणार आहे. याचा लाभ सुमारे पाच लाख शेतकऱ्यांना मिळेल, अशी अपेक्षा आहे.

इंडियन मर्चंट्स चेंबरने राज्य सरकारबरोबर केलेल्या या सामंजस्य करारांतर्गत बियाणांची तात्काळ तब्बल ५ लाख ८२ हजार पाकिटे वितरित करण्यात येणार आहेत. या पाकिटांची बाजारातील किंमत सुमारे ५० कोटी रुपये आहे. यातील ५० टक्के खर्च राज्य सरकार उचलणार असून उर्वरित ५० टक्के बियाणे पुरवणारी संबंधित कंपनी उचलणार आहे. या करारावर सरकारतर्फे कृषी विभागाचे अतिरिक्त मुख्य सचिव डॉ. भगवान सहाय व इंडियन मर्चंट्स चेंबरतर्फे आगामी अध्यक्ष दीपक प्रेमनारायण यांनी स्वाक्षऱ्या केल्या.