चार हजार जणांवर बेकारीची कुऱ्हाड

नवी दिल्ली ः पैशाची तीव्र टंचाई निर्माण झाल्यामुळे नाईलाजाने बंद कराव्या लागलेल्या ई-कॉमर्स क्षेत्रातील 'आस्कमी' या कंपनीमुळे तिच्या चार हजार कर्मचाऱ्यांवर बेकारीची कुऱ्हाड कोसळली आहे. आस्कमीची पालक कंपनी असलेल्या गेटिट इन्फोसर्व्हिसेसच्या लेखा पुस्तकांचे परीक्षण करण्यासाठी फोरेन्सिक ऑडिटर नेमला जाईल, असे आस्कमीचा मुख्य गुंतवणूकदार असलेल्या अॅस्ट्रो कंपनीने सांगितले आहे.

आस्कमीची सध्याची आर्थिक स्थिती पाहता तिच्या दायित्वांमध्ये आणखी वाढ होऊ नये, याची खबरदारी घेण्याची सूचना गेटिट इन्फोसर्व्हिसेसचे मुख्य वित्त अधिकारी आनंद सोनभद्र यांनी अंतर्गत ईमेलद्वारे दिली आहे. आस्कमीची देशात ४० केंद्रे आहेत. या ठिकाणच्या डिलिव्हरी बॉईज व कनिष्ठ कर्मचाऱ्यांना कामावरून कमी करावे लागणार आहे.