ऑनलाइन खरेदी:२० एप्रिलपासून ई-कॉमर्स सुरु

नवी दिल्ली : ई-कॉमर्स कंपन्यांच्या ऑनलाइन मंचावरून खरेदी करणाऱ्या ग्राहकांसाठी आनंदाची बातमी आहे. जीवनावश्यक वस्तू व औषधे याबरोबरच येत्या २० तारखेपासून अन्य वस्तू ऑनलाइन पद्धतीने ग्राहकांपर्यंत पोहोचवण्यास सरकारने ई-कॉमर्स कंपन्यांना हिरवा कंदील दाखवला आहे. २० एप्रिलपासून आर्थिक व्यवहार सुरू करण्याचे संकेत सरकारने दिले आहेत. यामध्ये सर्व वस्तूंचा ऑनलाइन व्यापारही सुरू होईल का, याबाबत विविध शक्यता वर्तवल्या जात होत्या. त्यांना आता पूर्णविराम मिळाला आहे.

सध्या ई-कॉमर्स कंपन्यांना जीवनावश्यक वस्तू, किराणा व औषधे यांचाच पुरवठा करण्याची मुभा देण्यात आली आहे. फ्लिपकार्ट, स्नॅपडिल व पेटीएम मॉल या कंपन्यांनी याआधीच २० एप्रिलपासून पूर्ण क्षमतेने काम करण्यास तयारी सुरू केली होती. त्याचवेळी अमेझॉन सरकारच्या अंतिम आदेशाची वाट पहात होते. केंद्रीय गृह मंत्रालयाकडून २० तारखेपासून आर्थिक व्यवहार सुरू करण्याचा आदेश येऊनदेखील त्यात पुरेशी स्पष्टता नव्हती. मात्र आता सरकारकडून सर्व बाबी स्पष्ट झाल्यामुळे वरील कंपन्या सर्व प्रकारच्या वस्तूंची विक्री पूर्वीप्रमाणेच ऑनलाइन करू शकणार आहेत.

गृहमंत्रालयाची मार्गदर्शक तत्त्वे -

- ई-कॉमर्स कंपन्यांना सर्व प्रकारच्या वस्तूंच्या वाहतुकीला परवानगी. मात्र यासाठी आवश्यक त्या परवानग्या कंपन्यांना काढाव्या लागणार.

- ट्रकमधून माल पाठवताना सोबत दोन चालक व एक हेल्पर यांना परवानगी देण्यात आली आहे.

- महामार्गावरील ट्रक दुरुस्ती, देखभाल करणारी दुकाने व ढाबे उघडण्यासाठी अनुमती. मात्र त्यासलाठी संबंधित राज्य आणि केंद्रशासित प्रदेश यांचे सामाजिक अंतराचे नियम पाळावे लागणार.

असे होणार फायदे -

- लॉकडाऊन काळात ग्राहकांना सर्व वस्तू घरबसल्या मागवता येणार.

- वस्तूंची खरेदी सुरू झाल्यामुळे अर्थव्यवस्थेत पैसा खेळू लागणार.

- ई-कॉमर्स कंपन्यांतील रोजंदारीवर तसेच कंत्राटी तत्त्वावर काम करणाऱ्या अनेक कर्मचाऱ्यांचा रोजगार परत मिळणार.

- वस्तूंची विक्री होऊ लागल्याने या वस्तूंचे उत्पादन करणाऱ्या कंपन्यांचे कामकाजही सुरू होऊ शकणार.