शाहरुख, गौरी, जुहीला ईडीची नोटीस

मटा ऑनलाइन वृत्त । नवी दिल्ली

आयपीएलमधील कोलकाता नाइट रायडर्स संघाचा मालक आणि अभिनेता शाहरुख खान तसेच त्याची पत्नी गौरी खान, अभिनेत्री जुही चावला यांना अंमलबजावणी संचालनालयाने नोटीस बजावली आहे. शेअर विक्री करताना फेमा कायद्यातील तरतुदींचं उल्लंघन केल्याप्रकरणी ही नोटीस बजावण्यात आली असून या तिघांच्याही अडचणी वाढण्याची शक्यता आहे.

शाहरुख, जुही, तिचे पती जय मेहता यांनी संघाचे शेअर ट्रान्स्फर करताना शेअरची किंमत कमी दाखवून फेमा (फॉरेन एक्स्चेंज मॅनेजमेंट अॅक्ट) नियमांचा भंग केल्याचा संशय आहे. ही शेअर विक्री २००८ मधील आहे. मॉरिशसमधील एका कंपनीला हे शेअर्स विकण्यात आले होते. आठ ते नऊ पट कमी दराने या शेअर्सची विक्री करण्यात आली होती.

कोलकाता नाइट रायडर्स संघाचा मालकी हक्क शाहरुख खानची कंपनी रेड चिलीज एंटरटेनमेंटकडे आहे. मेहता ग्रुपचे जय मेहता आणि त्यांची पत्नी जुही चावला यांची संघात भागिदारी आहे.

शाहरुखच्या कोलकाता नाइट रायडर्स स्पोर्ट्स प्रायव्हेट लिमिटेड कंपनीच्या शेअर्सचं मूल्यांकन चुकीच्या पद्धतीने करण्यात आलं आहे. त्यामुळे प्रति शेअर दर फार कमी झाला आहे, असं ईडीचं म्हणणं असून याप्रकरणी फॉरेन एक्स्चेंज मॅनेजमेंट अॅक्ट अंतर्गत तपास सुरू करण्यात आला आहे. ईडीने याआधी शाहरुखचीही याप्रकरणी चौकशी केलेली आहे.