नव्या रोजगारांत ऑक्टोबरमध्ये वाढ

वृत्तसंस्था, नवी दिल्ली: ऑक्टोबरमध्ये १२ लाख ४४ हजार नव्या रोजगारांची नोंद झाली आहे. एम्प्लॉइज स्टेट इन्शुरन्स कॉर्पोरेशनतर्फे (ईएसआयसी) मंगळवारी ही माहिती देण्यात आली. दुसरीकडे कर्मचारी भविष्य निर्वाह संघटनेच्या (ईपीएफओ) सदस्यांत ऑक्टोबरमध्ये ७.३९ लाख नव्या कर्मचाऱ्यांची भर पडली आहे.

ईएसआयसीच्या माध्यमातून ऑक्टोबरमध्ये सप्टेंबरच्या तुलनेत अधिक रोजगारनिर्मिती झाल्याचे दिसून आले. सप्टेंबरमध्ये १२.२३ लाख नवे रोजगार निर्माण झाले होते. गेल्या आर्थिक वर्षामध्ये (२०२८-१९) ईएसआयसीमध्ये एकूण १.४९ कोटी नव्या सदस्यांची भर पडली, अशी माहिती राष्ट्रीय सांख्यिकी कार्यालयाने दिली आहे. सप्टेंबर २०१७ ते ऑक्टोबर २०१९ या कालावधीसाठी हा आकडा ३.२२ कोटी होता, असेही या कार्यालयाने म्हटले आहे.