शाहरुख 'हाजिर हो'; 'ईडी'चे समन्स

मटा ऑनलाइन वृत्त । मुंबई

कोलकाता नाइट रायडर्स संघाचा मालक आणि अभिनेता शाहरुख खानला परकीय चलन व्यवस्थापन कायद्याचे (फेमा) उल्लंघन केल्याप्रकरणी अंमलबजावणी संचालनालयाने (ईडी) समन्स बजावले आहे. शाहरुखने २३ जुलै रोजी ईडीसमोर प्रत्यक्ष हजर रहावे, असे या समन्समध्ये नमूद करण्यात आले आहे.

आयपीएलचा दहावा हंगाम सुरू होण्याआधी ईडीने कोलकाता नाइट रायडर्स संघाचा मालक शाहरुख खान तसेच सहमालक असलेल्या गौरी खान आणि जुही चावला यांना 'फेमा' नियमांचं उल्लंघन केल्याप्रकरणी दोषी मानून 'कारणे दाखवा' नोटीस बजावली होती. त्यानंतर आता थेट शाहरुखला ईडीकडून समन्सच बजावण्यात आले आहे.

नाइट रायडर्स स्पोर्ट्सच्या २००८-२००९मधील शेअर्स विक्रीत अनियमितता आढळल्याने याप्रकरणी ईडीकडून चौकशी सुरू आहे. हे शेअर्स जुही चावलाचे पती जय मेहता यांच्या मॉरिशसमधील कंपनीला विकण्यात आले होते. हे शेअर्स कमी भावात विकण्यात आल्याने ७३.६ कोटींचे नुकसान झाले होते. याप्रकरणी याआधीही शाहरुखची चौकशी झालेली आहे.