‘ईपीएफओ’ची गृह योजना मार्चमध्ये सुरु

नवी दिल्ली ः निवृत्तीवेतनाचे संपूर्ण व्यवस्थापन करणाऱ्या कर्मचारी भविष्यनिर्वाह संघटनेने (ईपीएफओ) गृह योजना आणायचे ठरवले आहे. याचा फायदा ईपीएफओच्या चार कोटींहून अधिक सदस्यांना होणार असून ही योजना मार्चपासून सुरू होणार आहे. याअंतर्गत घर खरेदी करणाऱ्या सदस्यांना त्यांच्या ईपीएफ खात्यांतून डाउन पेमेंट करणे शक्य होणार आहे.

देशातील पाच राज्यांतील निवडणुकांचा धुरळा खाली बसल्यावर, ८ मार्च रोजी ही योजना सुरू होण्याची शक्यता आहे. योजनेअंतर्गत ईपीएफओच्या सदस्यांना घर खरेदी करता यावे यासाठी ईपीएफओ समन्वयकाचे काम करेल. योजना प्रत्यक्षात आणण्यासाठी ईपीएफओचे सदस्य तसेच त्यांच्या कंपन्या किंवा रोजगारदाते यांना समूह हाउसिंग सोसायटी स्थापन करणे गरजेचे आहे. ही सोसायटी विकासक व बँका यांच्याबरोबर करार करून प्रत्यक्ष बांधकामाला सुरुवात करेल, जेणेकरून ईपीएफओ सदस्यांना त्यात घर घेणे शक्य होईल.