EPF जमा न झाल्यास ई-मेल, SMS येणार

नवी दिल्ली: ईपीएफच्या (भविष्य निर्वाह निधी) नावाखाली अनेक कंपन्या कामगारांच्या पगारातून पैसे कापतात. पण ही रक्कम ते पीएफमध्ये जमा करत नाहीत. त्यामुळे नोकरी सोडल्यावर कामगारांच्या हातात अत्यंत अल्प रक्कम येते किंवा काहीच येत नाही. कंपन्यांचा हा मनमानी कारभार यापुढे चालणार नाही. कारण, पगारातून कंपनीने कापलेला पीएफ जमा न झाल्यास त्याचा मेसेज किंवा ई-मेल कामगाराला येणार आहे. त्यामुळे पीएफमध्ये होणारी गडबड रोखता येणार आहे.

ईपीएफओने कामगारांसाठी ही सुविधा निर्माण केली आहे. या सुविधेनुसार कंपन्यांनी कामगारांचा पीएफ वेळेत न भरल्यास थेट कामगारांनाच एसएमएस किंवा ई-मेलद्वारे त्याची माहिती मिळणार आहे. त्यासाठी कामगारांनी मोबाइल नंबर आणि ई-मेल आयडी त्याच्या युनिव्हर्सल अकाऊंट नंबर (UAN) बरोबर लिंक करून घेणे गरजेचे आहे. पीएफ जमा न झाल्यास आम्ही कामगारांना मिस्ड् कॉलही देऊ, असं केंद्रीय कामगार मंत्रालयानं स्पष्ट केलं आहे. याशिवाय पीएफ जमा झाला की नाही हे ई-पासबुकद्वारेही पाहता येणार आहे.