शेअर बाजारात घसरण: ‘इक्विटी फंडां’कडून निराशा

वृत्तसंस्था, नवी दिल्ली : करोना विषाणूच्या प्रादुर्भावामुळे शेअर बाजारातील मोठ्या घसरणीमुळे डेट म्युच्युअल फंडातील गुंतवणूकदारांच्या चेहऱ्यावर हास्य उमटले आहे. इक्विटी म्युच्युअल फंडांची कामगिरी गेल्या वर्षभरात अतिशय निराशाजनक राहिली असून, दुसरीकडे डेट फंडांनी आकर्षक कामगिरी केली आहे.

आकडेवारीनुसार इक्विटी म्युच्युअल फंडांपैकी इक्विटी इन्फ्रा गटातील फंडांची गेल्या वर्षभरातील कामगिरी उणे ३४.२१ टक्के राहिली असून, फोकस्ड गटातील फंडांचा परतावा उणे २१.४४ टक्क्यांवर गेला आहे. इंडेक्स फंडांनी याच कालावधीत उणे २६.४९ टक्के परतावा दिला आहे. या शिवाय लार्ज कॅप, मिड कॅप आणि मल्टि कॅप फंडांनी अनुक्रमे उणे २५.७० टक्के, उणे २६.२८ टक्के आणि उणे २५.३७ टक्के परतावा दिला आहे.

लॉकडाउन: ५२% नोकऱ्यांवर बेरोजगारीचे संकट!

त्याचप्रमाणे एफएमसीजी क्षेत्रानेही उणे १५.४६ टक्के परतावा दिला आहे. हेल्थकेअर क्षेत्राने सर्वांत कमी अर्थात उणे ४.३६ टक्के नुकसान केले आहे. स्मॉल कॅप आणि कॉन्ट्रा फंडांनी अनुक्रमे उणे ३१.७६ टक्के आणि उणे २९.९९ टक्के परतावा दिला आहे. या शिवाय व्हॅल्यू फंड, ईएलएसएस, वित्तीय सेवा आणि तंत्रज्ञान आदी क्षेत्रातील फंडांनी वर्षभराच्या कालावधीत २० टक्क्यांहून अधिक नकारात्मक परतावे दिले आहेत.

आयुर्विमाधारकांसाठी 'IRDA'चा 'हा' निर्णय

या उलट फिक्स्ड इन्कम क्षेत्रातील फंडांबाबत बोलायचे झाल्यास १० वर्षांच्या सरकारी गुंतवणुकीतील परतावा १५ टक्क्यांच्या आसपास राहिला असून, बँकिंग आणि पीएसयूने ९.५२ टक्के परतावा दिला आहे. याच कालावधीत सरकारी रोख्यांचा परतावा १२.८१ टक्के राहिला असून, दीर्घ कालावधीसाठी परतावा १५ टक्क्यांपेक्षा अधिकच राहिला आहे. कॉर्पोरेट रोख्यांनी ७.५५ टक्के परतावा दिला आहे. तर, डायनॅमिक रोख्यांनी ८.१५ टक्क्यांचा परतावा एका वर्षात दिला आहे. शॉर्ट ड्युरेशन फंडांनी आपापल्या गटांमध्ये ४.१४ टक्के आणि अल्ट्रा शॉर्ट कालावधीच्या फंडांनी ६.२९ टक्के परतावा दिला आहे.