वृत्तसंस्था, मुंबई
चीनच्या अर्थव्यवस्थेला आलेली मरगळ आणि धातू तसेच वाहन कंपन्यांच्या समभागांच्या मोठ्या प्रमाणावर झालेल्या विक्रीमुळे बुधवारी मुंबई शेअर बाजाराचा निर्देशांक (सेन्सेक्स) ३६३ अंकांनी घसरला. सुरुवातीच्या सत्रात मुंबई शेअर बाजाराचा निर्देशांक ५०० अंकांपर्यंत खाली घसरला. मात्र, नंतर त्यामध्ये हळूहळू सुधारणा झाल्याचे दिसून आले. बाजार बंद होताना 'सेन्सेक्स' ३६३.०३ अंकांनी घसरून ३५,८९१.५२च्या पातळीवर बंद झाला.
राष्ट्रीय शेअर बाजाराचा निर्देशांक (निफ्टी) ११७.६० अंकांनी घसरून १०,७९२.५०च्या पातळीवर बंद झाला. 'सेन्सेक्स'मधील कंपन्यांमध्ये वेदांता, टाटा स्टील, महिंद्र अँड महिंद्र, टाटा मोटर्स, मारुती, हीरो मोटोकॉर्प, पॉवरग्रीड, भारती एअरटेल, स्टेट बँक आणि कोल इंडियाच्या समभागांमध्ये ४.४८ टक्क्यांपर्यंत घसरण झाली. दुसरीकडे सनफार्मा, टीसीएस, एशियन पेंट्स, इन्फोसिस, येस बँक आणि आयसीआयसीआय बँकेचे समभागा १.६६ टक्क्यांपर्यंत वधारल्याचेही दिसून आले. देशांतर्गत बाजारांमध्ये डिसेंबरमध्ये वाहन उत्पादक कंपन्यांची कामगिरी घसरल्याने कंपन्यांच्या समभागांमध्येही घसरण झाल्याचे दिसून आले. या व्यतिरिक्त चलन विनिमय व्यवहारांमध्ये दुपारी डॉलरच्या तुलनेत रुपया ६४ पैशांनी घसरून ७०.०६च्या पातळीवर गेला. ब्रेंट क्रूडचा वायदाही १.२५ टक्क्यांनी घसरून प्रति बॅरल ५१.१२डॉलरवर पोहोचले. या दरम्यान विदेशी गुंतवणूकदारांनी मंगळवारी ४८.१९ कोटी रुपयांच्या समभागांची विक्री केली, तर देशांतर्गत गुंतवणूकदारांनी १४२.५८ कोटी रुपयांच्या समभागांची खरेदी केली. त्याचाही फटका दोन्ही शेअर बाजारांचे निर्देशांक घसरण्यावर बुधवारी झाला.