‘पीओएस’नेटवर्कमध्ये स्टेट बँक अव्वल

मुंबई : फेब्रुवारीअखेर स्टेट बँकेचे ‘पॉइंट ऑन सेल टर्मिनल’ (पीओएस) नेटवर्कचे जाळे देशात अव्वल ठरले आहे. मार्च २०१७पर्यंत आणखी ‘पीओएस’चे जाळे उभारण्यात येणार असल्याचे बँकेतर्फे स्पष्ट करण्यात आले. ३० एप्रिलपर्यंत स्टेट बँकेचे ‘पीओएस’चे जाळे ३ लाख ७ हजार पीओएस इतके विस्तारले आहे. गेल्या वर्षीच्या तुलनेत यंदा त्यात २६ टक्क्क्यांची वाढ झाली आहे. स्टेट बँकेनंतर एचडीएफसी बँक (२ लाख ८१ हजार ६४२), अॅक्सिस बँक (२ लाख ५८ हजार २५०) आणि आयसीआयसीआय बँक (२ लाख ७५६) या बँकांच्या ‘पीओएस’ची संख्या मोठी आहे.

‘सहारा’च्या जमिनींचा लिलाव?

गुंतवणूकदारांचे पैसे परत देण्यासाठी ‘सहारा समूहा’ची १४ राज्यांतील ४ हजार ७०० एकर जमिनीचा लिलाव पुकारण्यात येण्याची शक्यता आहे. या जमिनीची किंमत ६५०० कोटी रुपये असल्याचे वृत्त आहे. ‘सहारा’च्या एका दाव्यानुसार कंपनीकडे ३३ हजार ६३३ एकर जमीन आहे. त्यातील १० हजार ६०० एकर जमीन लोणावळ्यातील अँबी व्हॅली येथे आहे. तर, उत्तर प्रदेशातील अनेक शहरांमध्ये हजार एकरपेक्षा अधिक जमीन आहे.

'फाइव्ह-जी'साठी ‘नोकिया’चे प्रयत्न

नवी दिल्ली : नोकिया नेटवर्कतर्फे लवकरच फाइव्ह जी तंत्रज्ञानावर आधारीत डेटा सेवा सादर करण्यात येणार आहे. या सेवेसाठी कंपनीने देशातील आघाडीच्या मोबाइल कंपन्यासमवेत बोलणी सुरू केली आहेत. सध्या देशातील काही कंपन्यांनी फोरजी सेवा देण्यास नुकतीच सुरुवात केली आहे.

नोकिया नेटवर्कने यापूर्वीच अमेरिकेत व्हेरीझोन, कोरियात एसके टेलिकॉम आणि जपानमध्ये एनटीटी डोकोमो यांच्या सहकार्याने फाइव्ह-जी सेवेच्या चाचणीला सुरुवात केली आहे. कंपनीच्या दाव्यानुसार या तंत्रज्ञानामुळे प्रतिसेकंद १०० एमबी इतका वेग मिळणार आहे. फाइव्ह-जी सेवा देण्यासाठी किमान सहा हजार मेगाहर्ट ध्वनिपटाची (स्पेक्ट्रम) आवश्यकता असते. सध्या भारतात ७०० मेगाहर्ट ते २.६ गीगाहर्ट दरम्यानचा ध्वनिपट मोबाइल सेवांसाठी उपलब्ध आहे.