रेल्वे स्थानकांवर बॅटरीवरील कार उपलब्ध होणार

नवी दिल्ली : देशातील सर्व महत्त्वाच्या रेल्वे स्टेशनांवर लवकरच बॅटरीवर चालणाऱ्या कार उपलब्ध करून देण्यात येणार आहेत. या कारचा उपयोग प्रवाशांसाठी विशेषतः अपंग प्रवासी, ज्येष्ठ नागरिक यांना एका फलाटावरून दुसऱ्या फलाटावर नेण्यासाठी होणार आहे. मात्र, ही सेवा सशुल्क असून, त्यासाठी रेल्वेतर्फे प्रत्येक रेल्वे स्टेशनवर कंत्राटदाराची नेमणूक करण्यात येणार आहे. या शिवाय प्रवाशांना व्हीलचेअर, मदतनीसही उपलब्ध करून देण्यात येणार आहे. प्रवाशांची स्टेशनवर ने-आण करण्यासाठी लवकरच कॅब सेवाही सुरू करण्यात येणार असून, नोंदणी करण्यासाठी स्वतंत्र मोबाइल अॅपही विकसित करण्यात येणार आहे. पहिल्या टप्प्यात ही सेवा ७५ मोठ्या स्थानकांवर उपलब्ध करून देण्यात येणार आहे.

कारविक्री घसरली नवी दिल्ली ः कारच्या विक्रीत जून महिन्यात ५.१८ टक्के घसरण दिसून आली आहे. मात्र, प्रवासी कारच्या विक्रीत २.६८ टक्के वाढ दिसून आली आहे. सोसायटी ऑफ इंडियन ऑटोमोबाइल मॅन्युफॅक्चरर्स अर्थात सियामच्या मते जून महिन्यात देशांतर्गत २ लाख २३ हजार ४५४ प्रवासी कार विकल्या गेल्या. युटिलिटी वेहिकलच्या विक्रीत वाढ झाल्यामुळे ही विक्री वाढली. त्याचवेळी अन्य कार मात्र कमी विकल्या गेल्या. ग्राहकांची पसंती युटिलिटी कारना वाढत असल्याचे स्पष्ट दिसत आहे.

ब्रेग्झिटचा परिणाम कमी मुंबई ः आशिया - प्रशांत प्रदेशावर ब्रेग्झिटचा फारसा परिणाम दिसून येणार नाही, असे मूडीज या जागतिक मानांकन संस्थेने म्हटले आहे. असे असले तरी काही देशांसाठी बाह्य निधी मिळवताना अडचणी येऊ शकतात. मूडीजच्या अहवालानुसार, यूकेच्या जीडीपीची वाढ कूर्मगतीने होत असल्यामुळे युरोपीय समुदायातून बाहेर पडल्यानंतर यूकेकडून वस्तूंच्या मागणीत घट दिसून येईल, ज्याचा थेट फटका आशिया-प्रशांत प्रदेशातील काही देशांना बसू शकतो. परंतु त्यामुळे या देशांच्या जीडीपीवर फारसा परिणाम होणार नसल्याचा विश्वास मूडीजने व्यक्त केला आहे.