बँक ऑफ इंडियाने घटवला आधारदर

नवी दिल्लीः बँक ऑफ इंडियाने किमान कर्जदर अर्थात आधारदर ०.०५ टक्क्यांनी घटवून ९.६५ टक्के केला आहे. नवा दर ३० तारखेपासून लागू होईल. सध्या हा आधारदर ९.७० टक्के आहे. या बदलामुळे बँकेची सर्व प्रकारची कर्जे स्वस्त व्याजदराने मिळण्याची सुविधा उपलब्ध झाली आहे. 

वॉलमार्टची गुंतवणूक

नवी दिल्ली : देशातील ऑनलाइन रिटेल क्षेत्रातील दिग्गज कंपनी असणाऱ्या ‘फ्लिपकार्ट’मध्ये ‘वॉलमार्ट’ एक अब्ज डॉलर्सची गुंतवणूक करण्याची शक्यता असल्याचे वृत्त आहे. सध्या याबाबत दोन्ही कंपन्यांमध्ये चर्चा असून, लवकरच अंतिम निर्णय जाहीर होईल. सूत्रांनी दिलेल्या माहितीनुसार ‘वॉलमार्ट’‘फ्लिपकार्ट’चा अंशतः हिस्सा ताब्यात घेणार आहे. हा व्यवहार झाल्यास देशात मोठ्या प्रमाणात विस्तार करणाऱ्या ‘अॅमेझॉन’शी टक्कर देणे शक्य होणार आहे.

‘एमआरएफ’ ५० हजारांवर

मुंबईः वाहनांच्या टायरनिर्मितीत अग्रेसर ‘मद्रास रबर फॅक्टरी’ अर्थात ‘एमआरएफ’चा शेअर देशातील सर्वांत महागडा शेअर बनला आहे. बुधवारी शेअर बाजारात सत्रांतर्गत व्यवहारात ‘एमआरएफ’च्या शेअरने ७.२९ टक्क्यांची उसळी मारली आणि तो ५० हजार रुपयांच्या पातळीवर पोहोचला. कंपनीच्या एका शेअरची किंमत आयफोन सिक्सच्या किमतीपेक्षाही अधिक झाली आहे. देशांतर्गत बाजारात आयफोन सिक्सची किंमत सुमारे ४७ हजार रुपये आहे. ‘एमआरएफ’च्या शेअरने गेल्या सहा महिन्यांत गुंतवणूकदारांना ६५० टक्के परतावा दिला आहे. गेल्या वर्षभरात हा शेअर ३० हजार ते ५० हजार रुपयांच्या पातळीत होता. बुधवारी मात्र, या शेअरने पन्नास हजार रुपयांची पातळी गाठली. त्यामुळे कंपनीचे भांडवली मूल्य २१ हजार २१ कोटी रुपयांच्या घरात गेले.