१० रुपयांची नवी नोट

मुंबई : सुरक्षिततेचे अधिक उपाय योजलेली दहा रुपयांची नवी नोट लवकरच चलनात येणार आहे. महात्मा गांधी मालिका-२००५ अंतर्गत ही नोट असून या नोटेवरील क्रमांकपट्टीत इंग्रजी एल हे अक्षर असेल. नोटेवर गव्हर्नर डॉ. ऊर्जित पटेल यांची स्वाक्षरी असेल. नोटेच्या मलपृष्ठावर २०१७ हे छपाईवर्ष नोंदवले जाणार आहे. दहा रुपये मूल्याच्या सध्या चलनात असलेल्या नोटा यापुढेही चलनात राहतील, असे रिझर्व्ह बँकेने सांगितले आहे.

सिंडिकेट बँकेचे महिलांसाठी अॅप

मुंबई : सार्वजनिक क्षेत्रातील सिंडिकेट बँकेने सिंडसहेली हे खास महिलांसाठी अॅप्लिकेशन बाजारात आणले आहे. आंतरराष्ट्रीय महिला दिनानिमित्त हे अॅप बाजारात दाखल झाले असून या अॅपच्या साह्याने महिला ग्राहकांना त्यांच्याजवळची शाखा शोधून काढणे, एटीएम केंद्र शोधणे तसेच बँकेच्या कल्याणकारी योजनांची माहिती घेणे शक्य होईल. हे अॅप बँकेच्या महिला व मुले यांच्याविषयीच्या योजना, बँकशाखा, सार्वजनिक सुट्या तसेच दरमहिना बचत कशी करावी याविषयीच्या टिप्स जाणून घेण्यासाठी महिला ग्राहकांना मदत करणार आहे.

राज्य सहकारी बँकेला पुरस्कार

मुंबई : महाराष्ट्र राज्य सहकारी बँकेला उत्कृष्ट राज्य सहकारी बँक म्हणून नुकताच ‘बँको’ पुरस्कार प्रदान करण्यात आला. एव्हिज प्रकाशनातर्फे गोव्यात आयोजित केलेल्या पुरस्कार वितरण सोहळ्यात बँकेचे व्यवस्थापकीय संचालक प्रमोद कर्नाड यांनी हा पुरस्कार स्वीकारला. या पुरस्काराबरोबरच कर्नाड यांनी ‘टेक्नो अॅवॉर्ड’देखील स्वीकारले. राज्य सहकारी बँकेचे नेटवर्थ २ हजार १२७ कोटी रुपयांचे असून खेळते भांडवल २७ हजार कोटी रुपयांहून अदिक आहे. रिझर्व्ह बँकेने या बँकेला मोबाइल बँकिंगचा परवानाही दिला आहे.

स्मार्ट कार्डचे नियम

नवी दिल्ली : सरकारने गुरूवारी मोबाइल वॉलेट व स्मार्ट कार्ड यांच्याबाबत नियमांचा नमुना आराखडा प्रसिद्ध केला. यावर आता संबंधित कंपन्यांकडून सूचना मागवण्यात येणार आहेत. आयटी रुल्स २०१७ असे या आराखड्याचे नाव आहे. इलेक्ट्रॉनिक पेमेंट करताना त्याची सुरक्षितता, विश्वासार्हता तसेच सर्वसमावेशकता राखली जावी यासाठी या नियमावलीत तरतूद करण्यात आली आहे.