आर्थिक वर्ष बदलणारच

नवी दिल्ली ः आर्थिक वर्षाची सुरुवात एप्रिलपासून न करता जानेवारीपासून करण्याविषयी सरकार पुरेसे गंभीर असून असे लवकरच करण्यात येईल, अशी माहिती केंद्रीय अर्थमंत्री अरुण जेटली यांनी शुक्रवारी लोकसभेत एका लेखी उत्तरात दिली.

आर्थिक वर्षाची सुरुवात जानेवारीपासून होणार का याविषयी उलटसुलट चर्चा देशभर रंगली होती. मात्र जेटली यांनी ही माहिती दिल्यामुळे या चर्चांना आता पूर्णविराम मिळाला आहे. त्यामुळे आता दिनदर्शिकेप्रमाणे आर्थिक वर्ष सुरू होणार आहे. असे करता येईल का याचा अभ्यास माजी मुख्य आर्थिक सल्लागार शंकर आचार्य यांच्या अध्यक्षतेखालील समितीने पूर्ण केला आहे. या समितीचा अहवालही सरकारला मिळाला आहे. त्यामुळे जानेवारीपासून आर्थिक वर्ष सुरू करण्याचा मार्ग सुकर झाला आहे.