खूशखबर! पहिलं घर घेणाऱ्यास २.४ लाखांचा फायदा

मटा ऑनलाइन वृत्त । नवी दिल्ली

हक्काच्या घराचं स्वप्न पाहणाऱ्यांसाठी खूशखबर आहे. केंद्र सरकारच्या नव्या अनुदान योजनेनुसार पहिलं घर घेणाऱ्या व्यक्तीला कर्जाच्या व्याजात तब्बल २ लाख ४० हजार रुपयांची सवलत मिळणार आहे. वार्षिक उत्पन्न १८ लाखांपर्यंत असलेल्यांना या सवलतीचा लाभ मिळणार आहे.

गेल्या वर्षाच्या अखेरच्या दिवशी पंतप्रधान नरेंद्र मोदी यांनी पंतप्रधान आवास योजनेअंतर्गत दोन अनुदान योजना जाहीर केल्या होत्या. या योजनांचा तपशील सरकारनं जाहीर केला आहे. त्यानुसार, पहिल्यांदा घर खरेदी करणाऱ्यास व्याजदरात सवलत मिळणार आहे. आतापर्यंत केवळ सहा लाख वार्षिक उत्पन्न असलेल्यांनाच या योजनेचा लाभ मिळत होता. ही मर्यादा वाढवून आता १८ लाखांवर नेण्यात आली आहे. ही सवलत १५ व २० वर्षांच्या, अशा दोन्ही कालावधीच्या गृहकर्जांना लागू असेल. रिअल इस्टेट क्षेत्रातील व्यवहारांना प्रोत्साहन देतानाच २०२२ पर्यंत सर्वांना पक्की घरे देण्याचं लक्ष्य गाठण्याच्या उद्देशानं सरकारनं हे पाऊल उचललं आहे.

अशी मिळेल सवलत?

तुमचं वार्षिक उत्पन्न ६ लाख रुपयांपर्यंत असल्यास पहिल्या घराच्या खरेदीसाठी घेतलेल्या कर्जातील सहा लाख रुपयांच्या व्याजावर ६.५ टक्क्यांची सबसिडी मिळेल. गृहकर्जाची रक्कम कितीही असली तरी तुमच्या उत्पन्नानुसार तुम्हाला तुमच्या कर्जावरील पहिल्या सहा लाखांवरच सवलत मिळेल. उदाहरणार्थ, ९ टक्के व्याजदरानं एखाद्यानं २० लाख रुपये कर्ज घेतलं असल्यास त्यातील सहा लाखांवर त्याला २.५ टक्के व्याज भरावं लागेल. उरलेल्या १४ लाखांवर मात्र ९ टक्क्यांप्रमाणेच व्याज द्यावं लागेल.

व्याजातील सवलतीचा असा होईल फायदा