नवी दिल्ली : भारतीय रेल्वेने गुगलच्या सहकार्याने देशभरातील रेल्वे स्थानकांवर सुरू केलेली विनामूल्य वायफाय सुविधा आता सातशेहून अधिक स्थानकांवर उपलब्ध आहे. या सर्व स्थानकांत मिळून दरमहा तब्बल ८० लाख प्रवासी या सेवेचा उपयोग करतात, अशी माहिती रेल्वेने दिली आहे.
ही सेवा जानेवारी २०१६मध्ये सुरू झाली. ही सेवा देणारे मुंबई सेंट्रल हे पहिले स्थानक ठरले. भविष्यात अशा स्थानकांची संख्या सहा हजारांवर पोहोचेल, असा विश्वास केंद्रीय रेल्वेमंत्री पीयूष गोयल यांनी व्यक्त केला आहे.
जगातील आघाडीची सार्वजनिक वायफाय सुविधा.
दरमहा सरासरी ८० लाख प्रवाशांकडून वापर.
एकावेळी एका प्रवाशाला जास्तीत जास्त अर्धा तास वायफाय सुविधा.
एका प्रवाशाकडून एका वेळी सरासरी ३५० एमबी डेटाचा वापर.
देशभरातील सर्व स्थानकांत मिळून दरमहा किमान सात हजार टेराबाइट डेटा खर्च.
देशातील २७ राज्यांत मिळून ४०७ शहरी तर २९८ ग्रामीण भागांतील स्थानकांत सेवा उपलब्ध.