‘रिटर्न्स’साठी ‘आधार’ सक्तीचेच

सीबीडीटीचे स्पष्टीकरण; १ जुलैपासून अंमलबजावणी

वृत्तसंस्था, नवी दिल्ली

प्राप्तिकर विवरणपत्र भरण्यासाठी येत्या १ जुलैपासून आधार कार्ड सक्तीचेच असल्याचे स्पष्टीकरण ‘केंद्रीय प्रत्यक्ष करनिर्धारण मंडळा’ने (सीबीडीटी) शनिवारी दिले. त्यामुळे आधार कार्ड नसलेल्या करदात्यांना येत्या ३० जूनपर्यंतच दिलासा मिळेल.

सर्वोच्च न्यायालयाने शुक्रवारी दिलेल्या निकालाच्या हवाल्याने ‘सीबीडीटी’ने तीन मुद्द्यांचे निवेदन जारी केले आहे. ‘ज्यांच्याकडे आधार नाही किंवा ‘आधार’चा नोंदणी क्रमांक नाही, त्यांना अंशतः दिलासा दिला आहे. मात्र, १ जुलैनंतर प्राप्तिकर विवरणपत्र भरणाऱ्या प्रत्येक करदात्याला आधार कार्ड किंवा आधार नोंदणी क्रमांक सक्तीचा असणार आहे. तसेच, पॅनकार्ड नव्याने काढण्यासाठीही ‘आधार’ सादर करावे लागणार आहे’, असे निवेदनात नमूद करण्यात आले आहे.

‘आधार कार्डसाठी ज्यांनी अर्ज केला आहे किंवा ज्यांच्याकडे आधार कार्ड आहे, त्यांनी त्यांचा आधार क्रमांक प्राप्तिकर खात्याला सादर करावयाचा आहे; जेणेकरून संबंधित व्यक्तीचे आधार कार्ड आणि पॅन कार्ड जोडता येऊ शकेल’, असेही या निवेदनामध्ये म्हटले आहे.

पॅनकार्ड रद्द होणार नाही

सर्वोच्च न्यायालयाच्या निकालाचा ज्येष्ठ कायदेपंडित आणि तज्ज्ञ मंडळींनी काढलेल्या निष्कर्षानुसार, ज्या व्यक्तींकडे आधार कार्ड नाही त्यांचे पॅनकार्ड रद्द होणार नाही. पॅनकार्ड रद्द केले, तर ती व्यक्ती बँकिंग व्यवहारांपासून वंचित राहू शकते. त्यामुळे त्यांना तात्पुरता दिलासा दिला आहे.