टाइम्स वृत्त, नवी दिल्ली
सलग तीन दिवस स्थिर असलेल्या पेट्रोल व डिझेलच्या दरात मंगळवारी कपात करण्यात आली. पेट्रोल व डिझेलचे दर प्रतिलिटर अनुक्रमे सहा पैसे व १० पैशांनी घटवण्यात आले. यामुळे मुंबईत एक लिटर पेट्रोलचे दर ७८.५४ रुपयांवर आले. तर, प्रतिलिटर डिझेलसाठी ६९.०१ रुपये मोजावे लागत होते. नवी दिल्लीत पेट्रोल व डिझेलचे प्रतिलिटर दर ७२.९२ व ६५.८५ रुपये नोंदवण्यात आले. देशांतर्गत इंधनदराचा हा चालू महिन्यातील नीचांक आहे.
चालू महिन्यात पेट्रोल व डिझेलच्या दरात आतापर्यंत १.६ रुपयांपेक्षा अधिक कपात करण्यात आली आहे. आंतरराष्ट्रीय बाजारात कच्च्या इंधनाच्या किमतीत होत असलेली घसरण भारतासारख्या देशांच्या पथ्यावर पडत आहे. कच्च्या इंधनाच्या किमतीचा कल आणखी काही दिवस घसरणीचाच राहण्याचे संकेत असून त्यामुळे देशांतर्गत पेट्रोल, डिझेलच्या किमती नियंत्रणात राहण्यास मदत होणार आहे.