वृत्तसंस्था, मुंबई
साडेआठ हजार कोटी रुपयांच्या थकीत कर्जाच्या ओझ्यामुळे अस्तित्वासाठी झगडणाऱ्या जेट एअरवेजच्या समस्यांमध्ये दिवसेंदिवस भरच पडत आहे. जेटच्या ताफ्यातील ११९ विमानांपैकी केवळ १४ विमाने सद्यस्थितीत कार्यरत असल्याचे गुरुवारी स्पष्ट झाले. यामुळे या कंपनीचा आंतरराष्ट्रीय सेवा देण्याचा अधिकार रद्द होण्याची शक्यता आहे. जेटला आर्थिक उभारी देण्यासाठी या कंपनीतील भांडवली हिस्सा विकण्याचा निर्णय घेण्यात आला असून स्टेट बँकेकडून त्यासाठी निविदा प्रक्रिया सुरू केली आहे. मात्र या प्रक्रियेस अद्याप फार प्रतिसाद न मिळाल्याने जेटच्या भवितव्यापुढे प्रश्नचिन्ह निर्माण झाले आहे. जेटच्या १६ हजार कर्मचारी-अधिकाऱ्यांचे पगारही थकले असून उड्डाणे रद्द झालेल्या विमानांचा तिकीट परतावा देण्यातही जेटकडून कमालीचा विलंब होत असल्याने प्रवासीही त्रस्त झाले आहेत.
जेटच्या ताफ्यात एकूण ११९ विमाने आहेत. मात्र विमानतळांच्या भाड्यासह अनेक प्रकारची देणी थकवल्याने जेटच्या बहुसंख्य विमानांच्या उड्डाणांवर निर्बंध आले आहेत. इंडियन ऑइल या सरकारी इंधन कंपनीचे देणेही जेटने थकवले असून आतापर्यंत तीनवेळा इंडियन ऑइलने जेटला होणारा इंधनपुरवठा खंडित केला आहे. उड्डाणनिर्बंधांमुळे जेटची केवळ १४ विमाने सध्या कार्यरत असल्याचे गुरुवारी स्पष्ट झाले. डीजीसीएचे (नागरी विमान वाहतूक महासंचालनालय) सचिव प्रदीपसिंग खरोला यांनी ही माहिती दिली. 'कोणत्याही विमान कंपनीला आंतरराष्ट्रीय सेवा द्यायची असल्यास सरकारी नियमानुसार त्या कंपनीकडे २०हून अधिक विमाने कार्यरत असणे गरजेचे असते. मात्र जेटची १४ विमानेच सध्या कार्यरत असल्याने या कंपनीच्या आंतरराष्ट्रीय सेवेबाबतचा अधिकार तपासावा लागेल', असे ते म्हणाले. केवळ १४ विमाने कार्यरत असल्याने जेट ही भारतातील सद्यस्थितीतील सर्वात लहान विमान कंपनी ठरली आहे.
सिंगापूरची सेवा जेटकडूनच रद्द
सरकारने काही निर्णय घेण्यापूर्वीच जेटने आपली सेवा गुंडाळण्यास सुरुवात केल्याचे दिसते. जेटने आपली सिंगापूरसाठीची सेवा गुरुवारी रद्द केली. 'जेटने सिंगापूरला येणाऱ्या व सिंगापूरहून सुटणाऱ्या आपल्या विमानांची उड्डाणे रद्द केली आहेत. ज्या प्रवाशांनी या विमानांची तिकीटे आरक्षित केली आहेत त्यांनी आपल्या बुकिंग एजंटशी अथवा जेटशी संपर्क साधावा', असे ट्वीट सिंगापूरच्या शांघी विमानतळाने गुरुवारी केले. याशिवाय, देशांतर्गत सेवेत जेटने पूर्व व ईशान्येकडील उड्डाणे गुरुवारी रद्द केली. मुंबई-कोलकाता, कोलकाता-गुवाहटी, डेहराडून-गुवाहटी ही शुक्रवारची नियोजित उड्डाणेही रद्द झाल्याचे जेटने सांगितले.
गोयल यांची धडपड
जेटच्या अध्यक्षपदावरून पायउतार झालेले नरेश गोयल यांनी या कंपनीत पुन्हा एकदा प्रवेश करण्याच्या हालचाली सुरू केल्याचे संकेत मिळत आहेत. या कंपनीतील भांडवली हिस्सा विकत घेण्यासाठीच्या निविदा प्रक्रियेत गोयल सहभागी होण्याची शक्यता सूत्रांनी वर्तवली. आज, शुक्रवारी या निविदेची मुदत संपत आहे. दरम्यान, गोयल यांनी आपल्या हिश्श्याचे २६ टक्के म्हणजे २.९५ कोटी समभाग पंजाब नॅशनल बँकेकडे चार एप्रिलला सुरक्षा ठेव म्हणून ठेवले आहेत. या समभागांचे मूल्य अंदाजे साडेसात अब्ज रुपये आहे. आर्थिक अडचणीतील या कंपनीला पंजाब बँकेकडून तातडीचे कर्ज मिळावे यासाठी गोयल यांनी हे पाऊल उचलले आहे.
साडेआठ हजार कोटी रुपयांच्या थकीत कर्जाच्या ओझ्यामुळे अस्तित्वासाठी झगडणाऱ्या जेट एअरवेजच्या समस्यांमध्ये दिवसेंदिवस भरच पडत आहे. जेटच्या ताफ्यातील ११९ विमानांपैकी केवळ १४ विमाने सद्यस्थितीत कार्यरत असल्याचे गुरुवारी स्पष्ट झाले. यामुळे या कंपनीचा आंतरराष्ट्रीय सेवा देण्याचा अधिकार रद्द होण्याची शक्यता आहे. जेटला आर्थिक उभारी देण्यासाठी या कंपनीतील भांडवली हिस्सा विकण्याचा निर्णय घेण्यात आला असून स्टेट बँकेकडून त्यासाठी निविदा प्रक्रिया सुरू केली आहे. मात्र या प्रक्रियेस अद्याप फार प्रतिसाद न मिळाल्याने जेटच्या भवितव्यापुढे प्रश्नचिन्ह निर्माण झाले आहे. जेटच्या १६ हजार कर्मचारी-अधिकाऱ्यांचे पगारही थकले असून उड्डाणे रद्द झालेल्या विमानांचा तिकीट परतावा देण्यातही जेटकडून कमालीचा विलंब होत असल्याने प्रवासीही त्रस्त झाले आहेत.
जेटच्या ताफ्यात एकूण ११९ विमाने आहेत. मात्र विमानतळांच्या भाड्यासह अनेक प्रकारची देणी थकवल्याने जेटच्या बहुसंख्य विमानांच्या उड्डाणांवर निर्बंध आले आहेत. इंडियन ऑइल या सरकारी इंधन कंपनीचे देणेही जेटने थकवले असून आतापर्यंत तीनवेळा इंडियन ऑइलने जेटला होणारा इंधनपुरवठा खंडित केला आहे. उड्डाणनिर्बंधांमुळे जेटची केवळ १४ विमाने सध्या कार्यरत असल्याचे गुरुवारी स्पष्ट झाले. डीजीसीएचे (नागरी विमान वाहतूक महासंचालनालय) सचिव प्रदीपसिंग खरोला यांनी ही माहिती दिली. 'कोणत्याही विमान कंपनीला आंतरराष्ट्रीय सेवा द्यायची असल्यास सरकारी नियमानुसार त्या कंपनीकडे २०हून अधिक विमाने कार्यरत असणे गरजेचे असते. मात्र जेटची १४ विमानेच सध्या कार्यरत असल्याने या कंपनीच्या आंतरराष्ट्रीय सेवेबाबतचा अधिकार तपासावा लागेल', असे ते म्हणाले. केवळ १४ विमाने कार्यरत असल्याने जेट ही भारतातील सद्यस्थितीतील सर्वात लहान विमान कंपनी ठरली आहे.
सिंगापूरची सेवा जेटकडूनच रद्द
सरकारने काही निर्णय घेण्यापूर्वीच जेटने आपली सेवा गुंडाळण्यास सुरुवात केल्याचे दिसते. जेटने आपली सिंगापूरसाठीची सेवा गुरुवारी रद्द केली. 'जेटने सिंगापूरला येणाऱ्या व सिंगापूरहून सुटणाऱ्या आपल्या विमानांची उड्डाणे रद्द केली आहेत. ज्या प्रवाशांनी या विमानांची तिकीटे आरक्षित केली आहेत त्यांनी आपल्या बुकिंग एजंटशी अथवा जेटशी संपर्क साधावा', असे ट्वीट सिंगापूरच्या शांघी विमानतळाने गुरुवारी केले. याशिवाय, देशांतर्गत सेवेत जेटने पूर्व व ईशान्येकडील उड्डाणे गुरुवारी रद्द केली. मुंबई-कोलकाता, कोलकाता-गुवाहटी, डेहराडून-गुवाहटी ही शुक्रवारची नियोजित उड्डाणेही रद्द झाल्याचे जेटने सांगितले.
गोयल यांची धडपड
जेटच्या अध्यक्षपदावरून पायउतार झालेले नरेश गोयल यांनी या कंपनीत पुन्हा एकदा प्रवेश करण्याच्या हालचाली सुरू केल्याचे संकेत मिळत आहेत. या कंपनीतील भांडवली हिस्सा विकत घेण्यासाठीच्या निविदा प्रक्रियेत गोयल सहभागी होण्याची शक्यता सूत्रांनी वर्तवली. आज, शुक्रवारी या निविदेची मुदत संपत आहे. दरम्यान, गोयल यांनी आपल्या हिश्श्याचे २६ टक्के म्हणजे २.९५ कोटी समभाग पंजाब नॅशनल बँकेकडे चार एप्रिलला सुरक्षा ठेव म्हणून ठेवले आहेत. या समभागांचे मूल्य अंदाजे साडेसात अब्ज रुपये आहे. आर्थिक अडचणीतील या कंपनीला पंजाब बँकेकडून तातडीचे कर्ज मिळावे यासाठी गोयल यांनी हे पाऊल उचलले आहे.