Market Capitalization: अदानी समूहाच्या सात कंपन्यांचा भारतीय मार्केट कॅप वाढीमध्ये ८० टक्के वाटा, जाणून घ्या

मुंबई: जगातील तिसरे सर्वात श्रीमंत उद्योगपती गौतम अदानी (Goutam Adani) यांच्या कंपन्यांनी भारतीय शेअर बाजाराच्या बाजार भागभांडवलाच्या ( Market Capital) मार्केट कॅप) वाढीमध्ये मोठी भूमिका बजावली आहे. मार्केट कॅपच्या वाढीमध्ये अदानीच्या सात कंपन्यांचा वाटा जवळपास ८० टक्के राहिला आहे. या वर्षी गौतम अदानी यांच्या कंपन्यांच्या शेअर्सने नेत्रदीपक वाढ नोंदवली. यामुळे गौतम अदानी जगातील तिसरे सर्वात श्रीमंत व्यक्ती बनले आहेत. गौतम अदानी हे आशियातील पहिले व्यक्ती आहेत ज्यांना जगातील टॉप ३ श्रीमंत लोकांमध्ये जाण्याची संधी मिळाली आहे. ब्लूमबर्ग बिलियनेअर्स इंडेक्सनुसार, गौतम अदानी हे जगातील तिसरे सर्वात श्रीमंत उद्योगपती बनले आहेत.

३६५ टक्क्यांनी वाढ

अदानी ग्रुपच्या कंपन्यांमधील गौतम अदानी यांच्या शेअर्सचे मूल्य गेल्या दोन वर्षांत ११२ अब्ज डॉलर्स इतके वाढले आहे. जगातील सर्वात श्रीमंतांच्या कंपन्यांच्या शेअर्समधील वाढीत ही सर्वात वेगवान वाढ आहे. गौतम अदानी यांच्या संपत्तीत २ वर्षात ३६५ टक्क्यांनी वाढ झाली आहे. दोन वर्षांपूर्वी गौतम अदानी यांची संपत्ती ३०.७ अब्ज डॉलर होती, ती वाढून १४२ अब्ज डॉलर झाली आहे.




मार्केट कॅपमध्ये १२.७४ लाख कोटी

गौतम अदानी समूहाच्या कंपन्यांच्या शेअर्सचे भाव वाढल्याने भारताच्या शेअर बाजारालाही मोठी मदत मिळाली आहे. भारताच्या एकूण मार्केट कॅपमध्ये गौतम अदानींच्या सात सूचीबद्ध कंपन्यांचा वाटा सुमारे ८० टक्के आहे. २०२२ मध्ये भारताच्या शेअर बाजाराच्या मार्केट कॅपमध्ये १२.७४ लाख कोटी रुपयांची वाढ झाली आहे. तर गौतम अदानीच्या सर्व सूचीबद्ध कंपन्यांच्या मार्केट कॅपमध्ये या कालावधीत १० लाख कोटी रुपयांची वाढ झाली आहे.