मामाच्या एका टोमण्यामुळे बदलले अदानींचे जीवन, जगातील तिसर्‍या क्रमांकाचे श्रीमंत व्यक्ती बनले

अदानींनी ४० वर्षांत अनेक क्षेत्रात आपला व्यवसाय पसरवला. अदानी यांचा जन्म गुजराती जैन कुटुंबात झाला. हे कुटुंब कापडाचा व्यापार करायचे. उत्तर गुजरातमधील थरड येथून अहमदाबादला अदानी कुटुंब स्थलांतरित झाले होते. अदानी यांना सात भावंडे होती. त्यांचे कुटुंब जुन्या अहमदाबादच्या रतनपोल भागात राहत होते. (Photo Credit-TOI)

अदानी म्हणतात की, त्यांच्या मामाच्या टोमण्याने त्यांना काहीतरी करून दाखवत मोठे करण्याची प्रेरणा दिली. १९७७ मध्ये अदानी यांनी दहावीची परीक्षा दिली होती. कितीही अभ्यास केला तरी कुटुंबाचा कापडाचा व्यवसाय तुलाच सांभाळायचा आहे, असा टोमणा त्यांच्या मामाने मारला होता. यामुळे अदानींना काहीतरी मोठे करण्याची प्रेरणा मिळाली. अदानी म्हणतात, 'मी अभ्यासात चांगला होतो. पण या शब्दांनी मला मोठा विचार करण्याची प्रेरणा दिली.

अदानींनी लवकरच मुंबईतील एका कॉलेजमध्ये अडमिशन घेतले तेथे वाणिज्य शाखेत शिक्षण घेत असताना त्यांनी हिरे व्यापारात हात आजमावला. दरम्यान, कौटुंबिक व्यवसायाला हातभार लावण्यासाठी त्यांना कॉलेज सोडावे लागले. त्यांच्या कुटुंबाचा एक छोटा कापडाचा कारखाना होता. काही काळ त्यांनी ग्रॅन्युल्सपासून प्लास्टिक बनवण्याचे कामही केले. १९८० च्या उत्तरार्धात त्यांना समजले की ते चांगला व्यापार करू शकतात. मग काय, १९८८ मध्ये त्यांनी अदानी एक्सपोर्ट्सची स्थापना केली. यानंतर अदानींनी मागे वळून पाहिले नाही.

'स्वप्नांना मर्यादा नव्हती पण पैसा मर्यादित होता.', असे अदानी म्हणाले. कंपनीने गुजरात स्टेट एक्सपोर्ट कॉर्पोरेशन (GSEC) कडून कर्ज घेतले. दोन दशकांनंतर अदानी समूहाने जीएसईसीलाच विकत घेतले. १९९० मध्ये, अदानी समूहाने निर्यात-आयातीसाठी मुंद्रा बंदर विकसित केले. २००० मध्ये, अदानी समूहाने सिंगापूरस्थित कंपनी विल्मारसोबत संयुक्त उपक्रम सुरू केला. नुकताच या कंपनीचा आयपीओ आला. कंपनी फॉर्च्युन ब्रँडचे खाद्यतेल आणि इतर उत्पादने तयार करते. २००२ मध्ये, मुंद्रा हे देशातील सर्वात मोठे खाजगी बंदर बनले. २००९ मध्ये ग्रुपने थर्मल पॉवर प्लांटची स्थापना केली.

२०१५ मध्ये, अदानी समूहाने अक्षय ऊर्जा क्षेत्रात प्रवेश केला. २०१९ मध्ये, फ्रेंच कंपनी टोटल एनर्जीने अदानी गॅसमध्ये ३७ टक्के हिस्सा विकत घेतला. २०२० मध्ये, अदानी समूहाने मुंबई आणि नवी मुंबई विमानतळांमधील बहुतांश भागभांडवल विकत घेतले. २०२२ मध्ये, अदानी समूहाने एसीसी आणि अंबुजा सिमेंट विकत घेतले, 5G स्पेक्ट्रम खरेदी करण्यासाठी बोली लावली. तसेच NDTV मधील बहुसंख्य स्टेक खरेदी करण्याची घोषणा केली. आज अदानी समूह हा मार्केट कॅपनुसार देशातील सर्वात मोठा समूह आहे.