सोन्याची मागणी वाढणार

वर्षअखेर १० ग्रॅमसाठी लागणार ३३ हजार ५०० रुपये

वृत्तसंस्था, मुंबई

सोन्याची मागणी आगामी काळात मोठ्या प्रमाणावर वाढणार आहे. युरोपीय समुदायातून ब्रिटनने बाहेर पडण्याचा निर्णय सार्वमताने घेतल्यानंतर भांडवल बाजारात मोठ्या प्रमाणावर पडझड सुरू झाली आहे. त्यामुळे गुंतवणूकदारांची सर्व भिस्त सोन्यावर राहणार आहे. परिणामी सोने महागणार असून ते १० ग्रॅमसाठी ३३ हजार रुपयांवर जाईल, असा तज्ज्ञांचा कयास आहे.

जागतिक अस्थिरतेचा परिणाम भांडवल बाजारावर होऊ लागला की, सोन्यातील गुंतवणूक ही सुरक्षित समजली जाते. ब्रेग्झिटची घटना ताजी असून त्याचा परिणाम कंपन्यांच्या शेअर्सवर दिसून आला आहे. त्यामुळेही लोकांचा ओढा सोन्यातील गुंतवणुकीकडे वाढला असल्याचे दिसत आहे. त्याचप्रमाणे चालू वर्षात अमेरिकेत होणारी अध्यक्षपदाची निवडणूक, भूराजकीय अस्थिरता आणि चलन बाजारातील चढउतार यामुळेही गुंतवणूकदार सोन्यालाच पसंती देतील, हे उघड आहे. डिसेंबर अखेर सोने १० ग्रॅमसाठी ३३ हजार ५०० रुपयांवर जाईल, असे कॉमट्रेन्ड्झ रिसर्च संस्थेचे संचालक ज्ञानशेखर त्यागराजन यांचे म्हणणे आहे.

आंतरराष्ट्रीय बाजारात सोने प्रति औंस १ हजार ४७५ डॉलरवर जाणार असल्याचे बोलले जात आहे. बरिटनच्या सार्वमतानंतर शुक्रवारी सोन्याचा भाव आंतरराष्ट्रीय बाजारात ८.२ टक्क्यांनी वाढून प्रति औंस १ हजार ३१९ डॉलर झाला होता. त्याच दिवशी भारतातही सोने १० ग्रॅमसाठी एक हजार रुपयांनी वाढून घाऊक बाजारात ३० हजार ८७५ रुपयांवर गेले होते. अमेरिकेची अध्यक्षपदाची निवडणूक आणि चीनमधील आर्थिक अस्थिरता यांमुळेही सोन्याची मागणी वाढू शकेल. एन्जल ब्रोकिंगचे विभागीय सहयोगी संचालक नवीन माथुर यांच्या मते, येत्या काळात अमेरिकी डॉलर अशक्त होण्याची शक्यता आहे. त्यामुळेही सोन्याची मागमी वाढणार आहे.

मागणी वाढण्याची कारणे

- ब्रेग्झिटमुळे निर्माण झालेली अस्थिरता
- भावी काळात डॉलर अशक्त होण्याची भीती
- जगातील आर्थिक व राजकीय अस्थैर्य
- भूराजकीय अस्थिरता