ग्राहकांमध्ये सोने खरेदीचा उत्साह पण सराफ बाजार सावध, जाणून घ्या काय आहे कारण

मुंबई : यंदाची दिवाळी करोना काळानंतर येत असल्यामुळे बाजारपेठा विविध वस्तूंनी फुलल्या आहेत. बाजारात नागरिकांची लगबग देखील पहायला मिळत आहे. असे असले तरी, बाजारावर महागाईचे सावट दिसून येत आहे. यंदाच्या धनत्रयोदशीला सोन्याची खरेदी होईल याबद्दल सराफांच्या मनात सकारात्मक भावना असली तरी सराफ बाजार सावध आहे. प्रत्यक्ष दिवाळीची सुरुवात शनिवारपासून धनत्रयोदशीपासून होत असून पुढचा संपूर्ण आठवडा हा किरकोळ व्यवसायासाठी उत्कृष्ट आहे.

सणासुदीत महागाईचा तडका! खाद्यतेलाच्या किमती भडकल्या, वाचा सविस्तर
करोनाच्या पहिल्या व दुसऱ्या लाटेमुळे अनेकांनी आपले विवाह पुढे ढकलले आहेत. लांबणीवर टाकलेले विवाह यावर्षी होणार असून त्याचा मोठा फायदा दागिने उद्योगाला बसणार असल्याचे ऑल इंडिया जेम अॅण्ड ज्वेलरी डोमेस्टिक कौन्सिलचे अध्यक्ष आशीष पेठे यांनी सांगितले आहे. त्याचप्रमाणे गेल्या दोन वर्षांत सराफांच्या दालनात जाऊन प्रत्यक्ष सोनेखरेदी करता न आल्यामुळे यावर्षी ग्राहक मोठ्या प्रमाणावर सोने खरेदी करेल. यामुळे करोनापूर्व काळातील व्यवसायाइतका व्यवसाय यंदा होईल, असा विश्वासही पेठे यांनी व्यक्त केला.

वाढते व्याजदर, महागाईमुळे अमेरिकेची मंदीच्या दिशेने वाटचाल; GDP फक्त ०.५% राहण्याचा फिचचा अंदाज
यावर्षीची दिवाळी अशी

- खरेदीच्या दृष्टीने दिवाळी ही अत्यंत उत्साही दिसत आहे

- नवरात्र आणि दसऱ्याला मोठ्या प्रमाणावर सोने खरेदी झाली.

- सध्या सोने आणि चांदीचे दर हे आकर्षक असल्याने या उत्साहात भर पडत आहे.

- दागिने व मौल्यवान धातू यांच्या खरेदीसाठी देशात धनत्रयोदशी हा सर्वांत मोठा दिवस

- यावर्षी देशभरात १० हजार कोटी ते १२ हजार कोटी रुपयांचा व्यवसाय सराफी बाजारात होईल

- यंदाच्या उत्सवकाळात २५ हजार कोटी ते २५-३० हजार कोटींचा व्यवसाय अपेक्षित

दिवाळीत मिळणाऱ्या भेटवस्तू आणि बोनसवरही टॅक्स; सोने, मालमत्तेबाबत जाणून घ्या IT विभागाचा नियम
धनत्रयोदशीची खरेदी

- साधारणत: दिवाळीमध्ये इलेक्ट्रॉनिक्स, ऑटोमोबाइल्स, दागिने इत्यादी ग्राहकोपयोगी उत्पादनांच्या श्रेणीमध्ये सरासरी ३० अब्ज डॉलर्सची विक्री होते

- वस्तूविक्रीमध्ये दागिन्यांचा वाटा हा चार अब्ज डॉलरचा असतो.

- त्यामध्ये १.५ अब्ज डॉलर्सच्या दागिन्यांची विक्री ही केवळ धनत्रयोदशीला होते.

- यावर्षी ग्राहकांचा कल हा जड दागिन्यांकडे असल्याचे दिसून येत आहे.

- हलक्या वजनाचे दागिने हे विशेष करून भेट देण्यासाठी भाऊबीजेला घेतले जातील अशी अपेक्षा आहे.

"धनत्रयोदशीच्या दिवशी दागिने घेण्यासाठी मोठ्या प्रमाणावर आधी बुकिंग झाले आहे. वैयक्तिक गरजांनुसार दागिने तयार करण्याचा कल हा अलीकडच्या काळातील मोठा आहे. एकूणच गेल्या दिवाळीच्या तुलनेत ३० टक्के वाढ अपेक्षित आहे,"- डॉ.सौरभ गाडगीळ, अध्यक्ष व व्यवस्थापकीय संचालक, पीएनजी ज्वेलर्स.