'राजन यांना मुदतवाढ मिळणं देशाच्या भल्याचं'

मटा ऑनलाइन वृत्त । नवी दिल्ली

भाजप नेते सुब्रमण्यम स्वामी यांनी रिझर्व्ह बँकेचे गव्हर्नर रघुराम राजन यांच्याविरोधात आघाडी उघडून त्यांच्या हकालपट्टीची मागणी पंतप्रधानांकडं केली असताना प्रख्यात उद्योगपती आदि गोदरेज हे राजन यांच्या पाठिशी उभे राहिले आहेत. 'आरबीआयचे गव्हर्नर म्हणून राजन यांना मुदतवाढ मिळणं हे देशाच्या भल्याचं आहे. त्यांच्या मुदतवाढीला माझा पाठिंबा आहे,' असं गोदरेज यांनी म्हटलं आहे.

यूपीए सरकारच्या काळात गव्हर्नरपदी नेमणूक करण्यात आलेल्या राजन यांचा तीन वर्षांचा कार्यकाळ येत्या सप्टेंबरमध्ये पूर्ण होत आहे. त्यांना मुदतवाढ देण्यावरून सध्या उलटसुलट चर्चा सुरू आहेत. देशाच्या अर्थमंत्रिपदासाठी इच्छुक असलेले भाजप नेते स्वामी हे राजन यांना कडाडून विरोध करत आहेत. या पार्श्वभूमीवर गोदरेज यांनी राजन यांचं तोंडभरून कौतुक केलं आहे. 'इतर लोकांना काय वाटतं याबद्दल मला काहीही म्हणायचं नाही. राजन यांनी चांगलं काम केलं आहे. त्यांच्याकडं प्रचंड क्षमता आहे. जगभरात त्यांना आदर आहे. मध्यवर्ती बँकेचा सर्वात उत्तम गव्हर्नर म्हणून एका मासिकानं त्यांचा गौरव केला आहे. अशा माणसाला मुदतवाढ मिळाल्यास त्यात देशाचा फायदाच आहे,' असं गोदरेज म्हणाले.