अच्छे दिन! आता दर ६ महिन्यांनी वाढणार पगार

नवी दिल्ली: वर्षानंतर पगारवाढ न होता ती सहा महिन्यात झाली तर?.... खरे नाही वाटत ना...? पण हे खरे आहे आणि आता तुम्हाला दर सहा महिन्यांनी पगारवाढ मिळण्याची पद्धत लवकरच सुरू होणार आहे. मोदी सरकारने नोकरदारांसाठी ही नवी योजना आणली आहे. मात्र, हे अच्छे दिन केवळ खासगी क्षेत्रात काम करणाऱ्या नोकरदारांसाठीच असणार आहे.

महागाईचा सामना करण्यासाठी केंद्र सरकारने हा योजना आणली आहे. केंद्र सरकारच्या या पगारवाढीच्या या नव्या योजनेनुसार आता खासगी क्षेत्रातील नोकदारांना दर सहा महिन्यांनी पगारवाढ मिळणार आहे. अशा पगारवाढीमुळे खासगी क्षेत्रात काम करणाऱ्या नोकरदारांना एक प्रकारे दिलासाच मिळाला आहे. नव्या महागाई निर्देशांकानुसार, ही वेतनवाढ निश्चित केली जाणार आहे.

३ कोटी कर्मचाऱ्यांना होणार लाभ

केंद्र सरकारच्या या निर्णयामुळे संघटित औद्योगिक क्षेत्रातील ३ कोटी कर्मचाऱ्यांना फायदा मिळणार आहे. केंद्र सरकारच्या कर्मचाऱ्यांसोबत प्रत्येक ६ महिन्यांनंतर खासगी क्षेत्रातील कर्मचाऱ्यांच्या महागाई भत्त्याचे मूल्यांकन केले जाते.

केंद्र सरकारच्या या निर्णयानुसार, खासगी क्षेत्रात काम करणाऱ्या सुमारे ३ कोटी कर्मचाऱ्यांना आता दर सहा महिन्यांनी पगारवाढ मिळणार आहे. सरकारच्या उच्चस्तरीय समितीने औद्योगिक क्षेत्रात काम करणाऱ्या कर्मचाऱ्यांसाठी ग्राहक मूल्य निर्देशांकाचा नवा अहवालातील तयार केला आहे. त्यातील महागाई भत्ता या महागाई निर्देशांकात जोडला जाणार आहे.

किमान निवृत्तीवेतनात वाढ होणार का?

दरम्यान, आज कर्मचारी भविष्य निर्वाह निधी संघटना (ईपीएफओ) किमान मासिक निवृत्ती वेतनात दुपटीने वाढ करण्याचा निर्णय घेण्याची शक्यता व्यक्त होत आहे. त्यानुसार किमान मासिक निवृत्ती वेतन २ हजार रुपये होण्याची शक्यता आहे. या संदर्भात अर्थमंत्रालयाने कामगार मंत्रालयाकडे काही प्रस्तावही दिले आहेत.