पिचाई यांचा महिन्याचा पगार १०० कोटी

मटा ऑनलाइन वृत्त । ह्युस्टन

जगातील आघाडीची कंपनी असलेल्या 'गुगल'चे भारतीय वंशाचे मुख्य कार्यकारी अधिकारी (सीईओ) सुंदर पिचाई यांनी वार्षिक पगाराच्या बाबतीत एक नवं शिखर गाठलं आहे. पिचाई यांना मागील वर्षी, म्हणजेच २०१६ या वर्षांत पगार व अन्य भत्त्यांच्या स्वरूपात तब्बल १२.८५ अब्ज रुपये मिळाले आहेत. आधीच्या वर्षाच्या तुलनेत ही रक्कम दुप्पट असून सरासरी काढल्यास महिन्याला त्यांना १०० कोटी मिळाले आहेत.

पिचाई यांना २०१५ साली ६ लाख ५२ हजार ५०० दशलक्ष अमेरिकन डॉलर एवढा पगार मिळाला होता. २०१६ साली या रकमेत किंचित घट होऊन त्यांना ६ लाख ५० हजार अमेरिकन डॉलर मिळाले. मात्र, गुगलच्या पुनर्रचनेत मोलाची भूमिका बजावल्याबद्दल मागील वर्षी त्यांना शेअर्सच्या स्वरूपात १९८.७ दशलक्ष डॉलरचं पारितोषिक देण्यात आलं. ही रक्कम २०१५ साली मिळालेल्या पारितोषिकाच्या रकमेच्या दुप्पट आहे. त्यामुळं पिचाई यांचा एकूण पगार १२.८५ अब्जांवर गेला आहे.

सीईओपदी मिळालेली बढती आणि गुगलच्या अनेक नव्या सेवा यशस्वीरित्या सुरू केल्याबद्दल पिचाई यांना हा भरगच्च पगार देण्यात आल्याचं सांगितलं जात आहे. पिचाई यांच्या नेतृत्वाखाली गुगलचा जाहिरात आणि यू ट्यूब व्यवसाय प्रचंड प्रमाणात वाढला आहे. तसंच, कंपनीला मशिन लर्निंग, हार्डवेअर व क्लाउड कम्प्युटिंग क्षेत्रातही गुंतवणूक करणं शक्य झालं आहे. या सगळ्यामुळं त्यांच्या पगाराचा आकडा वाढला आहे.