आयात एसी, फ्रिज महागले

वृत्तसंस्था, नवी दिल्ली

परदेशातून आयात होणाऱ्या वॉशिंग मशिन्स, वातानुकूलीन यंत्रणा व रेफ्रिजरेटर्सच्या किंमतीत आज मध्यरात्रीपासून वाढ होणार आहे. चालू खात्यातील तूट (आयात व निर्यातीतील तफावत) कमी करण्याच्या हेतूने केंद्र सरकारने बुधवारी १९ परदेशी वस्तूंवरील आयात शुल्कात वाढ करण्याचा निर्णय घेतला. शुल्कवाढीच्या या सूचीतील सर्व वस्तू या कमी गरजेच्या (नॉन इसेन्शिअल) प्रकारातील असल्याचे सरकारने म्हटले आहे.

अमेरिकी डॉलरच्या तुलनेत भारतीय रुपयाचे सातत्याने होणारे अवमूल्यन तसेच, आंतरराष्ट्रीय बाजारात कच्च्या तेलाच्या किंमतीत होणारी वाढ यामुळे चालू खात्यातील तूट मोठ्या प्रमाणात वाढत आहे. यावर उपाय म्हणून विशिष्ट वस्तूंवरील आयात शुल्क वाढविण्यात येईल याचे संकेत सरकारने गेल्या आठवड्यात दिले होते. त्यानुसार बुधवारी या १९ वस्तूंची सूची जाहीर करण्यात आली. यामध्ये परदेशी वॉशिंग मशिन्स (१० किलोपेक्षा कमी क्षमतेची), वातानुकूलीन यंत्रणा, फ्रिज आदी वस्तूंचा समावेश आहे. या वस्तूंवर आता पूर्वीपेक्षा दुप्पट म्हणजे २० टक्के आयात शुल्क आकारले जाईल. विमानांसाठी लागणाऱ्या इंधनावरील आयात शुल्कही वाढविण्यात येणार आहे. याशिवाय कॉम्प्रेसर्स, स्पीकर्स आणि पादत्राणांवरील आयात शुल्क वाढवून ते अनुक्रमे १०, १५ व २५ करण्यात आले आहे. नव्या निर्णयानुसार रेडियल कार टायर्सना आता १० ऐवजी १५ टक्के आयात शुल्क द्यावे लागेल.

गेल्या आर्थिक वर्षांमध्ये या १९ वस्तूंपोटी तब्बल ८६ हजार कोटी रुपयांची आयात झाली होती. यामुळे चालू खात्यातील तुटीवर विपरित परिणाम होत असून यावर उपाय म्हणून हा निर्णय घेण्यात आल्याचे सरकारी पत्रकात म्हटले आहे.

सराफ बाजारात नाराजी

या सूचीमध्ये हिरे, रंगीत खडे आदींचाही समावेश असल्याने सराफ बाजारात नाराजी व्यक्त होत आहे. घडवलेले व पॉलिश केलेले हिरे, लॅबमध्ये उत्पादित केलेले हिरे, रंगीत खडे यांवरील आयात शुल्क पाच टक्क्यांवरून साडेसात टक्के करण्यात आले आहे. तर, दागिन्यांच्यां घटकांवर आता २० टक्के आयात शुल्क आकारले जाईल. आतापर्यंत हे शुल्क १५ टक्के होते.