सिनेउद्योगावर जीएसटीचा कसा परिणाम होईल?

>> सध्या ग्राहकांना १४.५ ते १५ टक्के कर सर्व प्रकारच्या प्रसारण सेवांसाठी (टीव्ही, केबल, डीटीएच), फिल्म तसेच डिजिटल माध्यमांसाठी द्यावा लागत आहे. यावर ८ ते १२ टक्के अन्य करांचा बोजाही आहे. जीएसटीनंतर १८ ते २० टक्के कर द्यावा लागणार आहे. त्यामुळे ग्राहकांवरील कराचा बोजा काहीसा कमी होणार आहे.

>> पीव्हीआरसारख्या चित्रपटगृह साखळीसाठी जीएसटी लागू होणे पथ्यावर पडणार आहे. चित्रपट निर्मात्यांसाठीही जीएसटी लागू होणे हितकारक होणार असल्याचा दावा केला जात आहे.

>> सध्या मल्टिप्लेक्सना तिकिटावर २७ टक्के कर भरावा लागत आहे. जीएसटी लागू झाल्यावर कराचा बोजा कमी होणार आहे. मात्र काही राज्यांतून सध्या वेगवेगळा कर असल्याने जीएसटी लागू झाल्यावर त्याचा कितपत फायदा होईल, याबाबत शंका आहे.

>> स्थानिक संस्थांकडून लावला जाणारा मनोरंजन कर मूळ जीएसटीबरोबर लावला गेल्यास एकूण करात वाढ होण्याची भीती आहे.

>> मनोरंजन क्षेत्रातील चित्रपट, मनोरंजन उद्यान आदी व्यवसायांचा करपूर्तता प्रक्रिया खर्च जीएसटी लागू झाल्याने वाढणार आहे. त्याचा फटका ग्राहकांना बसू शकतो.
...........

* अॅम्युजमेंट पार्क ही मुलांसाठी चांगला विरंगुळा आहेत. त्यांचा समावेश सरकारने रेसकोर्स, बेटिंग व कॅसिनो यांमध्ये केला आहे. त्यामुळे या उद्यानांवर २८ टक्के जीएसटी लागू होईल. परिणामी ही उद्याने चालवणे तोट्याचे होऊन बसणार आहे. याचा फटका ग्राहकांना बसेल.

- शिरीष देशपांडे, सीईओ, पॅन इंडिया पर्यटन प्रा. लि.
...........

* मराठी सिनेमांवर तरी जीएसटी कर नसावा, अशी निर्मात्यांची भूमिका आहे. केंद्र सरकारने १ जुलैपासून जीएसटी करप्रणाली लागू करण्याची घोषणा केली आहे. यात सिनेमाच्या तिकिटांवरही हा कर असणार आहे. याअंतर्गत १०० रुपयांच्या आतील तिकीटांवर १८ टक्के तर त्यावरील रकमेवर २८ टक्के कर लागणार असल्याचे म्हटले जाते. मात्र आजवर मराठी सिनेमांना सर्व कर माफ असल्यामुळे आता हा नवा कर द्यावा लागणार आहे. हे रद्द व्हायला हवे. अन्यथा मराठी सिनेसृष्टीला याचा मोठा फटका बसेल.

- नानूभाई जयसिंघानी, निर्माते