जीएसटीचे आजवर ९१८ निर्णय

नवी दिल्ली : केंद्रीय अर्थमंत्री अरुण जेटली यांच्या नेतृत्वाखालील जीएसटी परिषदेने दोन वर्षांच्या कार्यकाळात तब्बल ९१८ निर्णय घेतले व त्यासाठी ३० बैठका झाल्या, अशी माहिती केंद्र सरकारतर्फे रविवारी देण्यात आली.

वस्तू व सेवाकर (जीएसटी) गेल्या वर्षी एक जुलैपासून लागू झाला असला तरी त्याच्या पूर्वतयारीसाठी १५ सप्टेंबर २०१६ला जीएसटी परिषदेची स्थापना करण्यात आली होती. यानंतर या परिषदेच्या सातत्याने बैठका झाल्या. या ३० बैठकांमध्ये जीएसटीचे नियम, दरनिश्चिती, दरकपात आदी ९१८ निर्णय घेण्यात आले व त्यातील ९६ टक्के निर्णयांची अंमलबजावणीही झाली. उर्वरित निर्णयही लवकरच अंमलात येतील, असे सरकारतर्फे सांगण्यात आले.

जीएसटीची अंमलबजावणी झाल्यापासून केंद्र व राज्य सरकारचे १७ विविध कर रद्द झाले आहेत.